Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xviij. Capittel.

1. Een yeghelick sondighet ende doet wel, hemseluen, 21. den boetueerdighen sondaer, worden syne sonden, 24. ende den afuallighen rechtueerdighen, syne gerechticheden niet ghedacht, 30. warachtighe bekeeringhe weeret den ongheual ende doodt.

A.1

ENde des Heeren woordt gheschiedde tot my, ende sprack:

2

Wat drijft ghy onder v in den lande Israel, dit spreeckwoort, ende spreeckt: ^a De vaderen hebben ^b† suere wijndruyuen ghegheten, doch den kinderen zijn de tanden stomp daer van gheworden.

a Ierem. 31.c.29. Tren. 5.a.7.

b† An. heerlingen

3

So warachtich als ick leue, spreeckt de Heere Heere: Sodanich spreeckwoort en sal niet meer onder v gaen in Israel.

4

Want siet, ^c alle zielen zijn myne: des vaders ziele is so wel myne, als des soons ziele: ^d welcke ziele sondighet, die sal steruen.

c Psalm. 24.a.1.

d Deute. 24.b.16.

5

^e Wanneer nu yemandt vroom is, die recht ende wel doet:

e Leuit. 16.a.4.

6

Die op den berghen niet en eett, ⁺ die syne ooghen niet opheffet tot den Afgoden des huys Israels, ende zijns naesten wijf niet en beulect, ende en leyt niet by den wijue in harer kranckheyt,

+ Eens vromen mans wercken.

7

Die niemandt schade en doet, die den schuldenaer zijn pandt weder gheeft, die niemandt met ghewelt wat neemt, ^f die den hongherighen zijn broot mede deylet, ende den naeckten kleedet.

f Iesai. 58.a.7. Tob. 1.b.17. ende 4.b.13. Matth. 25.d.35. 4.Esd. 1.c.21.

8

Die gheenen ^g woecker en drijft, die niemant ouersettet, die zijn handt van den onrechte keeret, die tusschen den lieden recht oordeelt,

g Psalm. 15.a.5.

9

^h Die na mynen rechten wandelt, ende myne geboden houdt, dat hy ernstlicken daer na doet: dat is een vroom man, ⁱ die sal het leuen hebben, spreeckt de Heere Heere.

h Leuit. 18.a.4.

i Roma. 10.a.5.

B.10

Wanneer hy nu eenen sone ^k† genereert, ⁺ ende deselue wordt een moorder, die bloet verghiett, ^l ofte deser stucken een doet,

k† And. ghegenereert heeft,

+ Eens godloosen wercken.

l Iacob. 2.b.10.

11

Ende der anderen stucken gheene doet, maer eett op den bergen, ende beulect zijns naesten wijf,

12

^m Beschadighet de armen ende ellendighen, met gewelt wat neemt, het pandt niet weder en gheeft, syne ooghen opheffet tot den Afgoden, daermede hy eenen grouwel begaet,

m Hesek. 22.a.7.

13

ⁿ Gheeft op woecker, ouersettet: soude die leuen? hy en sal niet leuen: maer dewijle hy alle sulcke grouwelen gedaen heeft, sal hy des doots steruen: zijn bloet sal op hem zijn.

n Exod. 22.c.25. Deute. 23.b.19.

14

So hy daerentegen eenen sone genereert, die alle sulcke sonde siet, die zijn vader doet, ende hem vreeset, ende also niet en doet,

15

Eett niet op den berghen, heft syne ooghen niet op tot den Afgoden des huys Israels, beuleckt zijns naesten wijf niet,

16

Doet niemandt schade, behoudt het pandt niet, niet met gewelt wat en neemt, ^o deylt zijn broot mede den hongherighen, ende kleedet den naeckten:

o Iesai. 58.a.7. Tob. 1.b.17. Matth. 25.d.35.

17

Die zijn handt van onrecht afkeeret, neemt gheenen woecker noch ouersettinge, maer houdt myne gheboden, ^p ende leeft na mynen rechten: die en sal niet steruen, om zijns vaders misdaedt wille, maer leuen.

p Leuit. 18.a.4.

18

Doch zijn vader, die gheweldt ende onrecht bruyckt, ende onder synen volcke gedaen heeft, dat niet en deucht, siet, deselue sal steruen, om syner misdaet wille.

19

So spreect ghy: Waerom sal dan een sone niet dragen zijns vaders misdaet? daerom dat hy recht ende wel ghedaen, ende alle myne rechten ghehouden ende ghedaen heeft, sal hy leuen.

C.20

Want welcke ziele die sondighet, die sal steruen: ^q de sone en sal niet dragen de misdaet des vaders, ende de vader en sal niet draghen de misdaedt des soons: ^r maer des Rechtueerdighen gerechticheyt sal ouer hem zijn, ende des Onrechtueerdighen ongherechticheyt, sal ouer hem zijn.

q Deute. 24.b.16. 2.Reg. 14.a.6. 2.Para. 25.a.4.

r Hab. 2.a.4. Hesek. 14.c.20. Rom. 1.b.17

21

^s So hem nu de Godloose bekeeret van alle synen sonden, die hy ghedaen heeft, ende houdt alle myne rechten, ende doet recht ende wel: so sal hy leuen, ende niet steruen.

s Ierem. 18.a.7. Iesai. 55.a.7. Hesek. 33.b.14.

22

Alle syner ouertredinge, ⁺ die hy begaen heeft, en sal niet ghedacht worden: maer sal leuen om der gherechticheyt wille, die hy doet.

+ God en begheert des sondaers doot niet

23

^t Meynstu, dat ick een welgheuallen hebbe, aen den doot des Godloosen, spreeckt de Heere Heere, ende niet vele meer, dat hy hem bekeere van synen wesen, ende leue?

t Psal. 30.a.4.6. Hesek. 33.b.11. 2.Petr. 3.a.9.

24

^u Ende so hem de Rechtueerdighe keeret van syner gerechticheyt, ende doet wat quaets, ende leeft na allen grouwelen, die een Godloose doet: soude die leuen? Ia alle syner gherechticheyt die hy ghedaen heeft, en sal niet ghedacht worden, maer in syner ouertredinge ende sonden, die hy ghedaen heeft, sal hy steruen.

u Hesek. 3.b.11.

25

Noch spreeckt ghy: ^x De Heere en handelt niet recht: so hooret nu ghy van den huyse Israels? Isset niet also, dat ick recht hebbe, ende ghy onrecht hebbet?

x Hes. 33.b.17.c.20

26

Want wanneer hem de Rechtueerdige keeret van syner gherechticheydt, ende doet quaet, so moet hy steruen: hy moet Ia om syner boosheyt wille, die hy ghedaen heeft, steruen.

27

^y Wederom, wanneer hem de Godloose keeret van syner ongerechticheyt, die hy gedaen heeft, ende doet nu recht ende wel, die sal zijn ziele leuendich behouden.

y Iesai. 55.a.7.

28

Want dewijle dat hy siet, ende bekeeret hem van alle syner boosheyt, die hy ghedaen heeft, so sal hy leuen, ende niet steruen.

29

^z Noch spreken die van den huyse Israels: De Heere en handelt niet recht: soude ick onrecht hebben? ghy vanden huyse Israels hebbet onrecht.

z Hesek. 33.b.17.

D.30

Daerom wil ick v richten, ghy van den huyse Israels, ^a eenen yeghelicken na synen wesen, spreeckt de Heere Heere: ^b daerom, so bekeeret v van alle uwer ouertredinghe, op dat ghy niet vallen en moetet, om der misdaet wille.

a Roma. 2.a.6. Iob. 34.b.11. Apocal. 2.c.23. Ierem. 18.b.11. ende 25.a.5. ende 35.b.15. Ione. 3.a.8. 2.Reg. 17.b.13.

b Matth. 3.a.2.

31

Werpet van v alle uwe ouertredinghe, daer ghy mede ouertreden hebbet, ^c ende maeckt v een nieuwe herte, ende eenen nieuwen gheest: want waerom wiltu also steruen, du huys Israels?

c Hesek. 11.b.19. ende 36.c.26.

32

Want ick ^d en hebbe gheen welgeuallen aen den doot des steruenden, spreeckt de Heere Heere: daerom bekeeret v, so sullet ghy leuen.

d Hesek. 35.b.11. Sapient. 1.b.13.