Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

1. Afgoderie weeret Gods woordt, 4. ende wordt met bedriegherie door valsche Propheten, 6. daertoe met Gods ernstighen toorne ghestraffet. 12. Uan vier onuerbidlicke plaghen Gods, 21. daer dannoch sommighe, ten trooste der gheuanghenen te Babel, wtkomen souden.

A.1

ENde ^a daer quamen sommighe van den Oudtsten Israels tot my, ende setteden hen by my.

a Hesek. 20.a.1.

2

Doe gheschiedde des Heeren woordt tot my, ende sprack:

3

Menschen kindt, dese lieden hangen met haren herten aen haren Afgoden, ende houden vaste aen der erghernisse harer misdaet: soude ick hen dan antwoorden, wanneer sy my vraghen?

4

Daerom spreeckt met hen, ende segghet tot hen: So spreeckt de Heere Heere: ^b Welcker mensche van den huyse Israels, met der herten aen synen Afgoden hanghet, ende houdt vaste aen der erghernisse syner misdaedt, ende koemt ten Propheet: so wil ick de Heere den seluen antwoorden, als hy verdienet heeft met syner grooter Afgoderie.

b Hiob. 12.c.20.

5

Op dat het huys Israels bedroghen worde in haren herten, daerom, dat sy van my gheweken zijn, door menigherley Afgoderie.

6

Daerom saltu ten huyse Israels segghen: So spreeckt de Heere Heere: ^c Keeret ende wendet v van uwer Afgoderie, ende wendet uwe aenghesichten van alle uwe grouwelen.

c Hesek. 20.b.18.

7

Want welcker mensche van den huyse Israels, oft een vreemdelinck die in Israel woonet, van my wijcket, ende met syner herten aen synen Afgod hanghet, ende vaste houdt aen der erghernisse syner Afgoderie, ende ten Prophete koemt, dat hy my door hem vraghe, dien wil ick de Heere selfs antwoorden.

8

Ende wil mijn aenghesichte teghen den seluen setten, dat sy sullen woest, ende ten teecken ende spreeckwoordt worden, ende wilse wt mynen volcke roeyen: dat ghy ghewaer worden sullet, ick zy de Heere.

9

^d So doch een ^e bedroghen Propheet wat spreeckt, dien wil ick de Heere, wederom laten bedroghen worden: ende wil myne handt ouer hem wtstrecken, ende hem wt mynen volcke Israels roeyen.

d 1.Reg. 22.c.23. Hiob. 12.c.20. Hesek. 13.a.2. ende 34.a.3.

e Dat heet met goeden woorden bedrieghen, ijdel goedt, wt eyghenen goetduncken, sonder Gods woordt spreken, dien sullen syne goede woorden selfs bedrieghen, tot synen onghelucke.

B.10

Also sullen sy alle beyde hare misdaedt draghen: als de misdaedt des vraghers, also sal oock zijn de misdaedt des Propheten.

11

Op dat sy het huys Israels niet meer en verleyden van my, ende hen niet meer verontreynighen in allerley harer ouertredinghe: ^f maer sy sullen mijn volck zijn, ende ick wil haer God zijn, spreeckt de Heere Heere.

f Hesek. 11.c.20. Iere. 24.a.7. ende 31.d.33. Hebr 8.b.10.

12

Ende des Heeren woordt geschiedde tot my, ende sprack:

13

Du menschen kindt, wanneer het landt aen my sondighet, ⁺ ende my daertoe versmadet: so wil ick myne handt ouer dat selue wtstrecken, ^g ende den voorraedt des broodts wech nemen, ⁺ ende wil daer diere tijdt henen in schicken, dat ick beyde menschen ende vee, daerinne wtroeye.

+ Vier plaghen Gods.

g Hesek. 4.b.16. ende 5.b.16.

+ I. Hongher.

14

^h Ende wanneer dan schoon de dry mannen: Noah, ⁺ Daniel ende Hiob, daerinne waren, so souden sy alleene hare eyghen zielen verlossen, door hare gherechticheydt, spreeckt de Heere Heere.

h Iere. 15.a.1.

+ Noah. Daniel. Hiob.

15

Ende wanneer ick boose ghedierten in het landt brenghen woude, ⁺ die de lieden wech ruymeden, ende dat selue verwoesteden, dat niemant daerinne wandelen konde voor den ghedierten,

+ II. Boose ghedierten.

16

Ende dese dry mannen waren daer oock inne: so warachtich als ick leue, spreect de Heere Heere, sy en souden noch soons noch dochteren verlossen, maer alleene hen selfs, ende het landt moeste woest worden.

17

Oock wanneer ick het sweerdt komen liete, ⁺ ouer het landt, ende spreke: Sweerdt, varet door het landt, ende soude also beyde menschen ende vee wtroeyen:

+ III. Sweerdt.

18

Ende de dry mannen waren daerinne: so warachtich als ick leue, spreeckt de Heere Heere, sy souden noch soons noch dochteren verlossen, maer sy alleene souden verlosset zijn.

19

Oft so ick pestilencie in het landt schicken, ⁺ ende myne grimmicheyt ouer dat selue wtgiete woude, ende bloedt verstorten, also, dat ick beyde menschen ende vee wtroeyede:

+ IIII. Pestilencie.

[fol. 47v]

C.20

Ende Noah, Daniel ende Hiob, waren daerinne: so warachtich als ick leue, spreect de Heere Heere, sy souden noch soons noch dochteren, maer alleene hare eyghen ziele, door hare gherechticheyt verlossen.

21

Want so spreect de Heere Heere: So ic myne vier boose straffen, als het sweert, honger, boose ghedierte ende pestilencie, ouer Ierusalem schicken sal, ⁱ dat ick daerinne wtroeye beyde menschen ende vee:

i Iere. 27.b.17.

22

Siet, so sullen sommighe daerinne ouerblijuende daeruan komen, die soons ende dochteren wt brenghen sullen, ende tot v hier herwaerts komen: dat ghy sien sullet, hoe het hen gaet, ende v troosten ouer den onghelucke, dat ick ouer Ierusalem hebbe komen laten.

23

Sy sullen uwen ^k troost zijn, wanneer ghy sien sullet, hoe het hen gaet: ende ghy sullet gewaer worden, dat ick het niet sonder oorsake ghedaen en hebbe, wat ick daerinne gedaen hebbe, spreect de Heere Heere.

k De gheuangenen te Babel worden vrolic, dat die te Ierusalem ooc gheuancklick tot hen komen moesten: van welcken sy, als de afuallighen smadelicken ghehoont waren.