Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. De Prophete siet, hoe Ierusalem verbrandt worden soude. 9. Item een ander ghesichte der raders ende dieren, als hy in den eersten Cap. ghesien heeft.

A.1

ENde ick sach, ende siet, aen den Hemel bouen aen den hoofde der Cherubim, was het ghestalt als eenen Saphir, ende bouen den seluen was het aen te sien, als eenen Throon.

2

Ende hy sprack tot den ^a manne in den lijnen kleederen: Gaet henen in tusschen de raders onder den Cherub, ende vaet de handen vol gloeyender kolen, die tusschen den Cherubim zijn, ende stroyetse ouer de stadt: ende hy ghinck henen in, dat ick het sach, doe de selue henen in ghinck.

a Hesek. 9.a.2.

3

De Cherubim nu stonden ter rechter sijden aen den huyse, ende de voorhof wert binnen vol neuels.

4

^b Ende de heerlicheyt des Heeren verhief haer, van den Cherub, tot den dorpel aen den huyse, ende ^c het huys werdt vol neuels, ende de voorhof vol ^d glantzes van der heerlicheyt des Heeren.

b 2.Para. 7.a.1.

c Exod. 40.d.35.

d Of, glinsteringhe,

5

Ende men hoorede de vleughelen der Cherubim ruyschen tot daer buyten wt voor den voorhof, als een stemme des Almachtighen Gods, wanneer hy spreeckt.

6

Ende doe hy den manne in den lijnen kleederen gheboden hadde, ende geseyt: Neemt vyer tusschen den raderen, onder den Cherubim, ghinck de selue henen in, ende tradt by het radt.

7

Ende ^e† de Cherub strecte syne handt wt tusschen den Cherubim, tot den vyere, dat tusschen den Cherubim was, nam daer van, ende gaf het den manne in den lijnen kleede, in de handen: die ontfinck het, ende ghinck henen wt.

e† And. een etc.

8

^f Ende het scheen ^g† aen den Cherubim, ghelijck als eens menschen hant, onder haren vleughelen.

f Hesek. 1.a.8.

g† And. in

9

Ende ick sach, ende siet, vier raders stonden by den Cherubim, by eenen yeghelicken Cherub een radt: ^h ende de raders waren aen te sien, gelijck als een Turckoys.

h Hesek. 1.b.16.

B.10

Ende waren alle vier een als het ander, euen als ware deen radt in den anderen.

11

Wanneer sy gaen souden, so konden sy in alle vier hoecken gaen, ende en dorsten haer niet omme wenden, wanneer sy gingen: maer waer het vorste henen ginck, daer ghinghen sy henen na, ende en dorsten haer niet omme wenden,

12

Met tsamen haren gantschen lijue, rugghe, handen ende vleughelen: ⁱ ende de raders waren vol ooghen omme ende omme, aen alle vier raderen.

i Hesek. 1.b.18.

13

Ende hy riep tot den raderen: ^k Galgal, dat ick het hoorde.

k Galgal luydet als wy op Duyts spreken ten radt: Wendet, wendet, dat hem altoos wenden ende gaen sal.

14

^l Een yeghelick hadde vier aengesichten: het eerste aenghesichte was een Cherub, ^m het ander was een mensche, het derde een Leeuwe, het vierde een ⁿ Arndt.

l Hesek. 1.b.10.

m Apoc. 4.a.7.

n Hesek. 27.a.3. Dani. 7.a.4.

15

Ende de Cherubim sweyueden in der hoochde: het is euen dat gedierte, dat ick sach aent water Chebar.

[fol. 46r]

16

Wanneer de Cherubim ghinghen, so ghinghen de raders oock by hen: ende wanneer de Cherubim met haren vleughelen vluchterden, dat sy hen van der Aerden verhieuen, so en wendden hen de raders oock niet van hen.

17

Wanneer ghene stonden, so stonden dese oock: want een leuendich windt was in hen.

18

^o Ende de heerlicheyt des Heeren ghinck weder wt van den dorpel aen den huyse, ende settehaer bouen de Cherubim.

o Hesek. 11.c.23. ende 43.a.4.

19

Doe vluchterden de Cherubim met haren vleughelen, ende verhieuen haer van der Aerden, voor mynen ooghen: ende doe sy wtghinghen, ghinghen de raders by hen: ende sy traden in de deure aen den huyse des Heeren teghent Oosten, ende de heerlicheyt des Gods Israels, was bouen hen.

C.20

^p Dat is het ghedierte, dat ick onder den God Israels sach, aen den water Chebar, ende merckte dat het ^q Cherubim waren:

p Hesek. 1.a.3. ende 10.a.8.

q Hier sietmen, dat Cherub oft Cherubim niet en zy een sonderlicke creatuer, maer een gheuleughelts ghestaldt, oft een beelt eens voghels, ossen, leeuwen, menschen, daerinne de Engelen verschijnen, hoe sy willen. Daerom heeten sy oock Cherubim, ende worden door Cherubim bediedet. Als oock de Enghelen der Kercken, dat is, de Apostelen, Propheten, Bisschoppen oft Predickers etc.

21

Doe een yeghelick vier aenghesichten hadde, ende vier vleughelen, ende onder den vleughelen, ghelijck als menschen handen.

22

Hare aengesichten waren ghestalt, gelijc ickse aen den water Chebar sach, ende ginghen stracx voor hen wech.