Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vj. Capittel.

1. Israel wert met grousamen straffen gedreycht, om haerder grooter Afgoderie wille, 8. dien, die ouerblijuen ende hen tot den Heere bekeeren, ghenade, 11. den onboetueerdighen daerenteghen werdt ongheluck ende verderf toegheseyt.

A.1

ENde des Heeren woort gheschiedde tot my, ende sprack:

2

Du menschen kint, keert dijn aenghesichte tegen ^a de berghen Israels, ende propheteert teghen haer,

a Hesek. 36.a.1.

3

Ende spreeckt: Ghy berghen Israels, hoort het woort des Heeren Heeren, So spreeckt de Heere Heere, beyde tot den berghen ende kleynen berghen, beyde tot den beken ende dalen, Siet, ick wil het sweert ouer v brenghen, ende uwe hoochten ombrenghen:

4

Dat uwe Altaren verwoestet, ende uwe Afgoden verbroken worden sullen, ende wil uwe ^b† lichamen voor den beelden dootslaen laten.

b† And. verwondeden

5

Ia ick wil de lichamen der kinderen Israels, voor uwen beelden vellen, ende uwe gebeenten rondtomme uwe Altaren henen verstroyen.

6

Waer ghy woont, daer sullen de steden woeste, ende de hoochten ter wildernisse worden: want men sal uwe Altaren, woest ende ter wildernisse maken, ende uwe Afgoden verbreken ende te niete maken, ende uwe beelden ^c verslaen, ende uwe ^d† stichten verdelghen.

c Dat is, te morsel slaen

d† And. wercken

7

Ende verslaghene sullen onder v daer liggen: dat ghy ghewaer wordet, Ick zy de Heere.

8

Ick wil dannoch sommige van v ouerblijuen laten, die den sweerde ontgaen onder den Heydenen, wanneer ick v inden lande verstroyt hebbe.

9

De selue uwe ouerblijuende, sullen dan aen my ghedencken onder den Heydenen, daer sy geuanckelick zijn moeten: wanneer ick haer hoerische herte, dat van my gheweken is, ende hare hoerische ooghen, die na haren Afgoden ghesien hebben, verslagen hebbe: ende de boosheyt sal hen rouwen, die sy door allerley hare grouwelen begaen hebben.

B.10

Ende sullen ghewaer worden, dat ick de Heere zy, ende niet vergheefs ghesproken hebbe, sodanich ongheluck hen te doen.

11

So spreeckt de Heere Heere: Slaet dyne handen te samen, ende trampet met dynen voeten, ende spreect: Wee ouer alle grouwel der boosheyt inden huyse Israels, ^e daeromme sy door het sweert, honger, ende pestilencie, vallen moeten.

e Ierem. 21.a.9. ende 24.b.10. ende 27.a.8. ende 42.b.17.

12

^f Wie verre is, die sal aen der Pestilencie steruen, ende wie na by is, die sal door het sweerdt vallen: wie daerentegen ouerblijft, ende daerouer behoedt is, die sal van hongher steruen: also wil ick myne grimmicheyt onder hen volbrenghen:

f Hesek. 7.a.9.

13

Dat ghy ghewaer worden sult, ick zy de Heere, wanneer hare verslagene, onder haren Afgoden liggen sullen, rondtomme hare Altaren henen, bouen op allen kleynen berghen, ende bouen op allen bergen, ende onder allen groenen boomen, ende onder allen dicken eycken, aen welcke plaetsen, sy allerley Afgoden, soeten reuckoffer deden.

14

Ick wil myne hant teghen haer wtstrecken, ende het lant, woeste ende eensaem maken, van der woestijne aen tot Diblath toe, waer sy woonen: ende sullen ghewaer worden, dat ick de Heere zy.