Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Den Prophete wort vertoont, het belech Iersualems, 4. de dueringhe der geuanckenisse Israels ende Iuda, 8. met tsamen den kommerlicken hongher, die ouer Ierusalem ter tijt des belechs gaen soude.

A.1

ENde du menschen kindt, neemt eenen tichelsteen, dien legghet voor dy, ende ^a† beworpt daerop de stadt Ierusalem.

a† An. ontwerpt

2

Ende maeckt een belegheringhe daeromme henen, ende bouwet een bolwerck daeromme henen, ende treckt eenen wal daeromme henen, ende maect een heyr daeromme henen, ende settet ^b bocken rings wijse om haer henen.

b Daer waren in den vorigen tijden Arietes, daermen de mueren mede omstiet.

3

Voor dy nu, neemt een ijseren panne, die laet eenen ijseren muer zijn, tusschen dy, ende der stadt: ende richtet dijn aenghesichte tegen haer, ende belegtse: dat zy een teecken den huyse Israels.

4

^c Du salt dy oock op dyne slincker zijde leggen, ende de misdaet des huys Israels, op de selue legghen: so vele daghen, als du daerop ligst, so langhe saltu oock hare misdaet draghen.

c Ierem. 13.b.17.

5

^d Ick wil dy Ia de Iaren harer misdaet, na den ghetale der dagen maken, namelicken, dry hondert ende neghentich daghen: ^e so lange saltu de misdaet des huys Israels draghen.

d Dan. 9.c.24.

e Nume. 14.d.34.

6

Ende wanneer du sulcx wtghericht hebst, saltu dy daerna op dyne rechter zijde legghen, ende salt draghen de misdaedt des huys Iuda, veertich daghen lanck: want ick gheue dy hier oock telcken eenen dach voor een Iaer.

7

Ende richtet dijn aenghesichte ende dynen blooten arm, teghen dat belech Ierusalems, ende propheteert teghen haer.

8

Ende siet, ick wil stricken aen dy leggen, dat du dy niet wenden konnest, van eener zijden ter anderen, tot dat du de daghen dyner belegheringhe gheeyndet hebst.

9

So neemt nu tot dy tarwe, gerste, boonen, linsen, herse, ende spelte, ende doet het altesamen in een vat, ende maeckt dy so vele broots daer van, so vele daghen als du op dyner zijden liggen salt, dat du dryhondert ende neghentich daghen daer van te eten hebbest.

B.10

Also dat dyne spijse, die du daghelicks eten moest, twintich sikel swaer zy: sulcks saltu van eener tijt ter anderen eten.

11

Het water saltu oock na der mate drincken, namelicken, het seste deel van Hin: ende salt sulckes oock van eener tijt ter anderen drincken.

12

Gersten koecken saltu eten, die du voor haren ooghen by menschen ^f dreck, backen salt.

f Hy heeft by sulcken dreck moeten koken, gelijck als men by wasen ende koedreck koket: ende de spijse riect dan den vyere. Also souden sy ooc in sulcken noot ende honger komen, dat sy geen recht vyer noch broot, hebben souden.

13

Ende de Heere sprack: ^g Also moeten de kinderen Israels haer onreyne broot eten, onder den Heydenen, daer ickse henen verstooten hebbe.

g Hosee 9.a.3.

14

Doch ick sprack: Och Heere Heere, siet, mijn ziele en is noch noyt onreyne gheworden: want ick en hebbe van myner ieughet op, tot aen dese tijt, gheen aes noch wat verscheurt was, ghegeten, ende daer en is noyt gheen onreyn vleesch, in mynen mont ghekomen.

15

Doch hy sprack tot my: Siet, ick wil dy koemest voor menschenmest, toelaten, daer du dijn broot mede maken salt.

16

Ende sprack tot my: Du menschen kint, siet, ^h ick wil den voorraedt des broots te Ierusalem wech nemen, dat sy het broot eten moeten na der ghewicht, ende met kommer, ende het water na der mate, met kommer drincken.

h Hesek. 5.b.16. ende 14.b.13. 2.Reg. 25.a.3.

17

Daeromme dat het aen broot ende water feylen sal, ende een met den anderen trueren, ende in harer misdaet versmachten sullen.