Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat Lij. Capittel.

1. Wt oorsake des afuals Zedekie. 4. wert Ierusalem beleydt, ghewonnen, 12. gheplondert ende verbrant, 15. des volcx so te Ierusalem gheuonden wort, worden sommighe wech gheuoert, 16. sommighe inden lande ghelaten, 10. 24. sommighe ghedoodt, 28. tot het ghetal der geuangenen wt Iuda, van NebucadNezar tot verscheyden tijden wechgheuoert, wert aengeteeckent, 31. Ioiachim wort wt der geuanckenisse los ghegeuen.

A.1

ZEdekia ^a was eenentwintich Iaer oudt, ⁺ doe hy Koninck wert, ende regeerde elf Iaer te Ierusalem: zijn moeder die hiet Hamutal, een dochter Ieremia tot Libna.

a 2.Reg. 24.b.17. 2.Paral. 36.b.10. Ierem. 37.a.1.

+ Zedekia.

2

Ende dede, dat den Heere qualick beuiel, ghelijck als Ioiakim ghedaen hadde.

3

Want den toorne des Heeren ghinck ouer Ierusalem ende Iuda, tot dat hyse van synen aengesichte verwierp: ende Zedekia viel af vanden Koninck te Babel.

4

^b Maer inden neghenden Iare zijns Konincrijcx, aen den thienden dage der thiender maent, quam NebucadNezar de Koninc te Babel, met tsamen alle synen heyre, tegen Ierusalem, ende beleydense, ende maeckten daer een schantze rondtomme.

b 2.Reg. 25.a.1. Ierem. 39.a.1.

5

Ende de stadt bleef also beleydt, tot int elfde Iaer des Konincx Zedekia.

6

Maer aen den neghenden daghe der vierder maent, nam den hongher ouerhant in der stadt, ende het volck hadde niets meer vanden lande te eten.

7

Doe brackmen in de stadt, ende alle krijchslieden gauen de vlucht, ende togen ter stadt henen wt by nachte, des weechs henen na der poorte tusschen den tween mueren, na den hof des Konincx: doch de Chaldeen laghen rondtomme de stadt.

8

Ende doe dese henen togen, des weechs door het velt, Iaechde der Chaldeen heyr den Koninck na, ^c ende grepen Zedekia inden velde by Iericho: doe verstroyde hem alle zijn heyr van hem.

c 2.Reg. 25.a.5.

9

Ende sy vingen den Koninck, ende brachten hem henen op tot den Koninck te Babel na Riblath, die inden lande Hemath leyt: die sprack een oordeel ouer hem.

B.10

Aldaer liet de Koninck te Babel, de kinderen Zedekia, voor synen ooghen verworghen: ende hy verworchde alle Vorsten Iuda te Riblath.

11

Doch Zedekia liet hy de ooghen wt steken, ende liet hem met tween ketenen binden: ende de Koninck te Babel, voerde hem also na Babel, ende leyde hem inde geuanckenisse, tot dat hy sterf.

12

Aenden thienden daghe der vijfster maent, welcke is het neghentiende Iaer NebucadNezar des Konincx te Babel, quam NebusarAdan, de ^d† Hooftman, die ^e doorgaens by den Koninck te Babel was, te Ierusalem.

d† And. Hofmeester

e Of, alleweghe,

13

Ende ^f verbrandde des Heeren huys, ende des Konincx huys, ende alle huysen te Ierusalem, alle groote huysen verbrandde hy met vyere.

f 1.Reg. 9.a.7. 2.Reg. 25.a.9.

14

Ende het gantsche heyr der Chaldeen, dat by den Hooftman was, ruckten om alle mueren te Ierusalem rondtomme.

15

Doch het arme volck, ende ander volck, dat noch ouerich was inder stadt, ende ten Koninck te Babel vielen, ende het ouerighe hantwercks volck, voerde NebusarAdan de Hooftman gheuanckelick wech.

16

Ende van den armen volcke op den lande, liet NebusarAdan de Hooftman, wijngardeniers ende ackerlieden, blijuen.

17

^g Ende de metalen ^h kalomnen aen den huyse des Heeren, ende het ghestoelte, ende de metalen Zee aenden huyse des Heeren, verbraken de Chaldeen, ende voerden alle het metael vanden seluen na Babel.

g 2.Reg. 25.b.13.

h Of, pilaren,

18

Ende de ketelen, schoeffelen, messen, beckens, koocklepelen, ende alle metalen vaten, die-

[fol. 41r]

men inden Godsdienst plach te ghebruycken, namen sy wech.

19

Daertoe nam de Hooftman wech, wat gulden ende silueren was, aen ^i† bekeren, roockpannen, beckenen, ketelen, kandelaren, lepelen, ende schalen.

i† And. kruycken

C.20

De twee calomnen, de eenige Zee, de twaelf metalen runderen, die in ^k† der stede des gestoeltes stonden, ^l welcke de Koninck Salomo hadde laten maken, ten huyse des Heeren: des metaels van alle dese ^† gereetschap, was bouen mate vele.

k† And. onder het ghestoelie

l 1.Re. 7.b.15.c.23.

† And. vaten,

21

Der twee calomnen, was een yegelick achtien ellen hooch, ende een snoer twaelf ellen lanck, reycte rondtomme haer, ende was vier vingheren dicke, ende binnen hol.

22

Ende op eener yegelicken stont eenen metalen knoop, vijf ellen hooch, ende ^m† reepen ende graenaetappelen, waren aen eenen yeghelicken knoop, rondtomme henen, altemael metael: ende deen calomne was als de ander.

m† And. geulochten reepen

23

Der granaetappelen waren ses ende tnegentich daer aen: ende aller granaetappelen, waren hondert aen eenen reep rondtomme henen.

24

Ende de Hooftman nam den ^n† Priester Seraia, wt der eerster ordeninge, ende den Priester Zephania, wt der anderer ordeninghe, ende dry Deurwachters.

n† And. ouersten Priester Seraia, ende Zephania, die na hem de ouerste was,

25

Ende eenen Kamerlinck wt der stadt, die ouer de krijchslieden ghesettet was, ende seuen mannen, die by den Koninck zijn moesten, die inder stadt gheuonden werden: daer toe Sopher, den Heyrvorst, die het lantuolck plach te monsteren: daertoe tsestich mannen lantuolcx, die inder stadt gheuonden werden:

26

Dese nam NebusarAdan de Hooftman, ende brachtse den Koninck te Babel, na Riblath.

27

Ende de Koninck te Babel sloechse doodt te Riblath, die inden lande Hemath leyt: ^o also wert Iuda wt synen lande wech gheuoert.

o 2.Reg. 25.b.11.

28

Dit is het volck, dat NebucadNezar wech gheuoert heeft, namelicken, inden seuenden Iare, dry duysent ende dry ende twintich Ioden.

29

Ende inden achthienden Iare NebucadNezar, acht hondert, ende twee ende dertich zielen wt Ierusalem.

D.30

Ende inden dryentwintichsten Iare des NebucadNezars, voerde NebusarAdan de Hooftman, seuen hondert ende vijf ende veertich zielen, wech wt Iuda: aller zielen zijn vier duysent, ende ses hondert.

31

^p Ende inden seuenendertichsten Iare, ⁺ daer na als Ioiachin de Koninck Iuda, wech gheuoert was, aenden vijf ende twintichsten daghe der twaelfster maent, verhief ^q EuilMerodach de Koninck te Babel, inden Iare doe hy Koninck wert, het hooft Ioiachin des Konincx Iuda, ende liet hem wt de gheuanckenisse,

p 2.Reg. 25.c.27.

+ Ioachin.

q Ierem. 50.a.1.

32

Ende sprack vriendelicken met hem, ende settede synen stoel, bouen der Koninghen stoelen, die by hem te Babel waren.

33

Ende veranderde hem de kleederen syner geuanckenisse, dat hy voor hem att, ^r doorgaens zijn leefdaghe.

r Of, alleweghe.

34

Ende hem wert doorgaens synen nootdruft vanden Koninck te Babel ghegheuen, als het hem verordineert was, zijn gantsche leuen lanck tot aen zijn eynde.

Eynde des Propheten Ieremie.