Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xlvij. Capittel.

1. Een propheteringhe teghen de Philisteen.

A.1

DIt ^a is het woort des Heeren, ⁺ dat tot den Prophete Ieremia gheschiedde teghen de Philisteen, eer dan Pharao Gaza sloech.

a Iesa. 14.c.29. Hesek. 25.b.15. Zephan. 2.a.4.

+ Philisteen.

2

So spreeckt de Heere: Siet, daer komen wateren opwaerts van Noorden, die een vloedt maken sullen, ende beyde het landt ende wat daerinne is, beyde de steden, ende die daerinne woonen, wech drijuen sullen: dat de lieden sullen schreyen, ende alle inwooners inden lande huylen,

[fol. 38r]

3

Voor den ghedoemel harer stercker peerden, die daer henen drauen, ende voor het bolderen harer waghens, ende ommeloopen harer raderen: dat hen de vaders niet en sullen ommesien na den kinderen, so vertzaecht sullen sy zijn,

4

Voor den dage die daer koemt te verstooren, alle Philisteen, ende wt te roeyen ^b Tyrum ende Zidon, met tsamen haren anderen hulperen: want de Heere sal de Philisteen, die het ouerblijfsel zijn wt den Eylande Caphthor, verstooren.

b Iesa. 23.a.1. Hesek. 26.a.3. ende 27. 28.

5

Gaza sal kael worden, ende Ascalon, met tsamen den ouerghebleuenen in haren gronden, verderuen: hoe langhe ^c krabstu dy?

c Uan grooten rouwe: als die doen, die ouer eenen dooden hen kratzen, welck doch Mose verbiedt, Deute. int. 14. cap. a.1.

6

^d O du sweert des Heeren: wanneer wiltu doch ophouden? vaert doch in dyne scheyde, ende rustet, ende weest stille.

d Ierem. 48.b.10.

7

Doch, hoe kantstu ophouden? dewijle dat dy de Heere beuel ghedaen heeft tegen Ascalon, ende dy teghen de hauen aen de Zee, bestellet.