Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xliij. Capittel.

1. Iohanan ende alle het volck, en geloouen de woorden des Propheten niet, ende trecken tegen Gods ghebodt in Egypten, 6. de Propheet, dien sy oock mede nemen, seydt hen, wat hen aldaer ontmoten sal.

A.1

DOe Ieremia alle woorden des Heeren haers Gods hadde wtghesproken, tot allen volcke, als hem dan de Heere haer God, alle dese woorden aen hen, beuolen hadde.

2

Sprack Asaria de sone Hosaia, ende Iohanan de sone Kareah, ende alle ^a wreuelighe mannen tot Ieremia: ^b Du liegst: de Heere onse God en heeft dy niet tot ons ghesonden, noch gheseyt, Ghy en sullet niet in Egypten trecken, aldaer te woonen.

a Dat is, onbillicke, vrecke, stoute.

b Iere. 42.a.5.

3

Maer Baruch de sone Neria ouerredet dy dies ons teghen: ⁺ op dat wy den Chaldeen ouerghegheuen worden, dat sy ons dooden, ende na Babel wech voeren.

+ Baruch.

4

Also hoorde Iohanan de sone Kareah, ende alle Hooftlieden des Heyrs, met tsamen den gantschen volcke, der stemme des Heeren niet, dat sy in den lande Iuda, ghebleuen waren:

5

Maer Iohanan de sone Kareah, ende alle Hooftlieden des Heyrs, nam tot hem alle ouerghebleuen wt Iuda, ^c die van allen volcken, daer henen sy gheuloden, weder ghekomen waren, dat sy in den lande Iuda woonden.

c Iere. 41.b.16.

6

Namelicken, mans, vrouwen ende kinderen, daertoe des Konincks dochteren, ende alle zielen, die NebuzarAdan de ^d† Hooftman, by Gedalia den sone Ahikam, ⁺ des soons Saphan, ^e† ghelaten hadde: oock den Propheet Ieremia, ende Baruch den sone Neria.

d† And. Hofmeester,

+ Ieremia moet met den volcke in Egygten reysen.

e† And. ende by den Propheet etc. den sone Neria ghelaten hadde. Iere. 40.a.1.4.

7

Ende toghen in Egyptenlandt: want sy en wouden der stemme des Heeren niet hooren, ende quamen te Thachpanhes.

8

Ende des Heeren woordt gheschiedde tot Ieremia, te Thachpanhes, ende sprack:

9

Neemt groote steenen, ende begraeftse ^f† in den Tiechelouen, die voor der poorten in den huyse Pharas is te Thachpanhes, dat het de mannen Iuda aensien.

f† And. in den mortel onder den Tiechelouen.

B.10

Ende segt tot hen: So spreeckt de Heere Zebaoth de God Israels: ^g Siet, ick wil henen senden, ende mynen knecht NebucadNezar den Koninck te Babel, halen laten, ende wil synen stoel bouen op dese steenen setten, die ick begrauen hebbe, ende hy sal syne tenten daerouer opslaen.

g Iere. 25.a.9. ende 46.b.13.

11

Ende hy sal komen ende Egyptenlant slaen: ende dooden wien hy treft, geuancklick voeren wien hy treft, met den sweerde slaen wien hy treft.

12

Ende ick wil den huysen der Goden in Egypten met vyere aensteken, dat hyse verbrande ende wech voere: ende hy sal hem Egyptenlandt aentrecken, als een herder zijn kleedt aentreckt, ende met vreden van daer trecken.

13

Hy sal de ^h† beeldtpijlaren tot BethSemes in Egyptenlant verbreken, ende de Afgodenkercken in Egypten, met vyere verbranden.

h† An. des Sonnentempels.