Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxv. Capittel.

1. De Heere beklaecht hem met exempel der Rechabiteren, 12. dat menschen geboden, bouen de syne, aenghenomen ende ghehouden worden, 17. dreyghet de onghehoorsamen Ioden haer ongheluck, 18. den gehoorsamen Rechabiters doch, seyt hy synen seghen toe.

A.1

DIt is het woordt, dat van den Heere geschiedde tot Ieremia, ter tijdt Ioiakim des soons Iosia, des Konincks Iuda, ende sprack:

2

Gaet henen in der ^a Rechabiters huys, ⁺ ende spreeckt met hen, ende brenghet haer in des Heeren huys, in eene der Capellen, ende schenct hen wijn.

a 2.Reg. 10.b.15.

+ Rechabiters.

3

Doe nam ick Iesania den sone Ieremia, des soons Habazinia, met tsamen synen broederen ende allen synen sonen, ende het gantsche huys der Rechabiten,

4

Ende brachtese in des Heeren huys, in de Capelle der kinderen Hanan, des soons Iegdalia, des mans Gods, welcke by der Vorsten Capelle is, bouen der Capelle Maseia des soons Sallum, des ^b† Doorwachters,

b† And. Schatwaerders.

5

Ende ick settede den kinderen van der Rechabiten huyse, bekers vol wijns, ende schalen voor, ende sprack tot hen: Drincket wijn.

6

Doch sy antwoordden: Wy en drincken geenen wijn: want onse vader Ionadab, de sone Rechab, heeft ons gheboden ende gheseyt: Ghy ende uwe kinderen en sullet nemmermeer gheenen wijn drincken,

7

^c Ende gheen huys bouwen, gheen zaet saeyen, gheenen wijnberch planten noch hebben, maer sullet in hutten woonen uwe leefdage: op dat ghy lange leuet in den lande, daer ghy inne wandelet.

c Iere. 29.a.5.

8

Also hooren wy der stemme onses vaders Ionadab, des soons Rechab, in allen dat hy ons gheboden heeft, dat wy gheenen wijn en drincken onse leefdaghe, noch wy noch onse wijuen, noch soons noch dochteren.

[fol. 34r]

9

Ende en bouwen oock gheene huysen, daer wy inne wooneden, ende hebben noch wijnberghen, noch ackers, noch zaedt.

B.10

Maer woonen in hutten, ende hooren ende doen alle dinck, als onse vader Ionadab gheboden heeft.

11

Als nu NebucadNezar de Koninck te Babel, opwaerts int lant tooch, spraken wy: Koemt, laet ons na Ierusalem trecken, voor den Heyre der Chaldeen ende Syriers, ende zijn also te Ierusalem ghebleuen.

12

Doe gheschiedde des Heeren woordt tot Ieremia, ende sprack:

13

So spreeckt de Heere Zebaoth, de God Israels: Gaet henen, ende spreeckt tot dien in Iuda, ende tot den burgeren te Ierusalem, Willet ghy v dan niet beteren, dat ghy mynen woorden hooret? spreeckt de Heere.

14

De woorden Ionadab des soons Rechab, die hy synen kinderen gheboden heeft, dat sy gheenen wijn drincken en sullen, worden gehouden, ende en drincken gheenen wijn, tot op desen dach, daerom dat sy haers vaders gheboden hooren: doch ick hebbe v ^d doorgaens predicken laten, noch en hooret ghy my niet.

d Of, alleweghe, Hebr. vroech.

15

^e So hebbe ick oock doorgaens tot v ghesonden, alle myne knechten de Propheten, ende laten segghen: Bekeert v, een yegelick van synen boosen wesen, ende betert uwe wesen, ende volget anderen Goden niet na, hen te dienen, so sullet ghy in den lande blijuen, dat ick v ende uwen vaderen gegeuen hebbe, ^f doch ghy en woudet uwe ooren niet herwaerts neygen, noch my hooren.

e Iere. 18.b.11. ende 25.a.3.5. Iona. 3.a.8. 2.Reg. 17.b.13. Hesek. 18.d.30.

f Prouer. 1.c.24. Iesa. 65.b.11. ende 66.a.4. Iere. 7.b.13.

16

So doch de kinderen Ionadab des soons Rechab, haers vaders ghebodt, dat hy hen gheboden heeft, ghehouden hebben: doch dit volck en hoort my niet.

17

Daerom, so spreeckt de Heere, de God Zebaoth, ende de God Israels: Siet, ick wil ouer Iuda, ende ouer alle burghers te Ierusalem, komen laten alle het ongheluck, dat ick teghen haer ghesproken hebbe: daerom dat ick tot hen ghesproken hebbe, ende sy niet hooren en willen, ick hebbe geroepen, ende sy en willen niet antwoorden.

18

Ende ten huyse der Rechabiten sprack Ieremia: So spreeckt de Heere Zebaoth, de God Israels: Daerom, dat ghy den ghebode ws vaders Ionadab hebbet ghehoort, ende alle syne geboden ghehouden, ende alles dat ghedaen, wat hy v gheboden heeft,

19

Daerom spreeckt de Heere Zebaoth, de God Israels also: ^g Het en sal Ionadab den sone Rechab nemmermeer feylen, daer sal yemant van den synen, alle tijdt voor my staen.

g Iere. 33.b.17.