Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxix. Capittel.

1. Brieuen Ieremie aen de geuangenen te Babel, 4. daer hyse van haren handel, wandel, 8. hoede, 10. waerschuwinghe der gheuanckenisse ende wederkomst na Ierusalem, 16. Item van des Konincks ende dier, die te Ierusalem ghebleuen zijn, 20. 24. met tsamen dryer valscher Propheten in Babel, omkomen, inne vermaent.

A.1

DIt zijn de woorden in den ^a† brief, dien de Propheet Ieremia sandt van Ierusalem, tot den ouerghebleuenen Oudtsten, die wech gheuoeret waren, ende tot den Priesteren ende Propheten, ende tot den gantschen volcke, dat NebucadNezar van Ierusalem hadde wech geuoert na Babel.

a† And. boeck,

2

(Daerna als de Koninck Iechania, ende de Koninginne, met den Kamerlingen ende Vorsten in Iuda ende Ierusalem, met tsamen den ^b† timmerlieden ende smeden te Ierusalem,wech waren:)

b† And. werckmeesteren, ende versluyters [dat is, die met legersluyten ende anderen krijchstuyghen konden]

3

Door Eleasan den sone Saphan, ende Gemaria den sone Hilkia (welcker Zedekia de Koninc Iuda sandt na Babel, tot NebucadNezar den Koninck te Babel) ende sprack:

4

So spreeckt de Heere Zebaoth, de God Israels tot allen gheuangenen, ⁺ die ick hebbe van Ierusalem laten wech voeren na Babel,

+ Brieuen Ieremie aen de geuanghenen te Babel.

5

^c Bouwet huysen, daer ghy in woonen moghet, planttet houen, daerwt ghy de vruchten eten moghet.

c Iere. 35.a.7.

6

^d Neemt wijuen, genereert soons ende dochteren: neemt uwen soons wijuen, ende gheuet uwen dochteren mannen, dat sy soons ende dochteren baren: vermeeret v aldaer, dat uwer niet weynich en zy.

d Gene. 1.c.27. ende 9.a.1.

7

Soecket der stadt ^e† veste, daer henen ick v hebbe laten wech voeren, ^f ende biddet voor haer den Heere: want wanneer het haer wel gaet, so gaet het v oock wel.

e† And. vrede.

f Baruch. 1.b.11. 1.Timot. 2.a.2.

8

Want so spreeckt de Heere Zebaoth, de God Israels, ^g Latet v de Propheten, die by v zijn, ende de Waerseggers, niet bedrieghen, ende en hoort uwen droomen niet, die v droomen.

g Iere. 14.b.13. ende 23.b.16.c.21. ende 27.a.9.b.15.

9

Want sy propheteren v leughenen, in mynen Name: ick hebse niet gesonden, spreect de Heere.

B.10

^h Want so spreect de Heere: Wanneer te Babel tseuentich Iaren wt zijn, so wil ick v besoecken, ende wil mijn ghenadige woordt, ouer v verwecken, dat ick v weder aen dese plaetse brenge.

h Dat is, de hooftspreucke, die ter dier tyt het volck behouden heeft, ende Dani. 9. gepresen wordt. 2.Para. 36.c.22. Esr. 1.a.1. Iere. 25.b 12. Dani. 9.a.2.

11

Want ick weet wel, wat ick voor ghedachten ouer v hebbe, spreeckt de Heere, namelicken gedachten des vreedts ende niet des leedts, dat ick v gheue het eynde, dies ghy verwachtet.

12

ⁱ Ende ghy sullet my aenroepen, ende henen gaen, ende my bidden, ende ick wil v verhooren.

i Deut. 4.c.29. ende 30.a.1. Hiob. 22.c.27.

13

^k Ghy sullet my soecken ende vinden: want so ghy my van gantscher herten soecken sullet,

k Ioan. 7.d.34. Matth. 7.a.7. Luc. 1.a.9.

14

So wil ick my van v vinden laten, spreeckt de Heere, ende wil uwe geuanckenisse wenden, ende v vergaderen wt allen volcken, ende van allen plaetsen, daer ick v henen verstooten hebbe, spreect de Heere: ende wil v wederom aen dese plaetse brenghen, daer van ick v hebbe wech voeren laten.

15

Want ghy meynet, de Heere hebbe v ^l te Babel Propheten opghewecket.

l Dat is, Ghy en sullet uwe Propheten te Babel niet geloouen: ick en hebse niet verwecket, als ghy meynet.

16

Want also spreect de Heere van den Koninc, die op Dauids stoele sitt, ende van allen volcke dat in deser stadt woonet, namelicken van uwen broederen, ^m die met v gheuancklick henenwt ghetoghen zijn.

m 2.Reg. 24.b.15.

17

Ia also spreeckt de Heere Zebaoth: ⁿ Siet, ick wil het sweert, honger ende pestilencie onder haer schicken, ende wil met hen omgaen, als met den boosen vijghen, daer eenen voor walget te eten.

n Iere. 24.a.8. Hosee. 9.b.10.

18

Ende wil achter hen henen zijn, met den sweerde, hongher ende pestilencie, ^o ende wilse in gheenen Koninckrijcke op Aerden blijuen laten, dat sy sullen ten vloecke, ten wonder, ten ^* hoone, ende ten spotte, onder allen volcken worden, daer ickse henen verstooten sal.

o Iere. 24.a.9.

* Of, versmadinghe

19

Daerom, dat sy mynen woorden niet en hooren, spreeckt de Heere: ^p ick die myne knechten de Propheten ^q doorgaens tot v gesonden hebbe: doch ghy woudet niet hooren, spreect de Heere.

p Iere. 25.a.4. ende 44.a.4.

q Of, alleweghe, Hebr. vroech.

C.20

Doch ghy alle, ghy die gheuanckelick zijt wech gheuoeret, die ick van Ierusalem hebbe na Babel trecken laten, hoort des Heeren woordt:

21

So spreeckt de Heere Zebaoth, de God Israels, teghen Ahab den sone Kolaia, ⁺ ende tegen Zedekia den sone Maseia, ⁺ die v valschelick propheteren in mynen Name: siet, ick wilse gheuen in de handen NebucadNezar des Konincks te Babel, die salse slaen laten voor uwen ooghen.

+ Ahab.

+ Zedekia.

22

Datmen sal van den seluen eenen vloeck maken, onder allen gheuanghenen wt Iuda, die te Babel zijn, ende segghen: De Heere doe dy, ghelijck als Zedekia ende Ahab, welcker de Koninck te Babel op den vyere braden liet.

23

Daerom, dat sy een dwaesheyt in Israel beginghen, ende bedreuen ouerspel met ^r† andere wijuen, ende predickten valschelick in mynen Name, dat ick hen niet beuolen en hadde: sulcks weet ick ende betuyghe het, spreeckt de Heere.

r† An. haers naesten wijuen etc.

24

Ende tegen Semaia van Nehalam, ⁺ saltu seggen:

+ Semaia.

25

So spreect de Heere Zebaoth, de God Israels: Daerom, dat du onder dynen name hebst brieuen ghesonden, tot allen volcke, dat te Ierusalem is, ende tot den Priester Zephania den sone Maseia, ende tot allen Priesteren, ende gheseyt:

26

De Heere heeft dy ten Priester ghesettet, in de stede des Priesters ^s Iehoiada, dat ghy sullet opsienders zijn in den huyse des Heeren, ouer alle waensinnighe ende Propheteerders, dat duse in den kercker ende stock settest.

s 2.Reg. 11.a.4. 2.Para. 23.a.1.

27

Nu waerom en straffestu den Ieremiam van Anathoth niet, die v propheteert?

28

Daerom, dat hy tot ons na Babel gheschicket heeft, ende laten segghen: Het sal noch lange dueren: bouwet huysen, daer ghy inne woonet, ende planttet houen, dat ghy vruchten daer van eett.

29

Want Zephania de Priester hadde den seluen brief ghelesen, ende den Propheet Ieremia laten toe hooren.

D.30

Daerom gheschiedde des Heeren woordt tot Ieremia, ende sprack:

31

Sendet henen tot allen gheuanghenen ende laet hen segghen: So spreeckt de Heere teghen Semaia van Nehalam: ^t Daerom dat v Semaia propheteert, ende ick en hebbe hem doch niet ghesonden, ende maect dat ghy op leugenen vertrouwet:

t Iere. 28.b.15.

32

Daerom spreeckt de Heere: Siet, ick wil Semaia van Nehalam te huys soecken met tsamen synen zade, dat der synen niemant, sal onder desen volcke blijuen, ende en sal het goede niet sien, dat ick mynen volcke doen wil, spreeckt de Heere: want hy heeftse met syner reden, van den Heere afghewendet.

[fol. 31v]