Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxviij. Capittel.

1. Hananias valsche propheteringhe, 5. worden van den Ieremia nederleyt, ende valsch bewesen. 10. de Heere wil voor het houten iock Ieremie dat Hanania breeckt, 13. een ijseren ghemaket hebben, 15. ende laet den Hanania syner sonde straffe aensegghen.

A.1

ENde in den seluen Iare in aenbeghinne des Koninckrijcx Zedekia, ⁺ des Konincx Iuda, in der vijfster Maendt des vierden Iaers, sprack Hanania de sone Azur, een Propheet van Gibeon, tot my in den huyse des Heeren, in teghenwoordicheydt der Priesteren ende alles volcks, ende seyde:

+ Hanania een valsch Propheet.

2

So spreeckt de Heere Zebaoth, de God Israels, Ick hebbe het iock des Konincks te Babel verbroken.

3

^a Ende eer twee Iaer omme zijn, wil ick de vaten des huys des Heeren, die NebucadNezar de Koninck te Babel, heeft van deser stadt wech ghenomen, ende na Babel gheuoert, wederom aen dese plaetse brenghen.

a Iere. 27.b.16.

4

Daertoe Iechania den sone Ioiakim den Koninck Iuda, met tsamen allen gheuangenen wt Iuda, die na Babel gheuoert zijn, wil ick oock weder aen dese plaetse brengen, spreeckt de Heere: want ick wil het iock des Konincks te Babel verbreken.

5

Doe sprack de Propheet Ieremia, ⁺ tot den Propheet Hanania, in teghenwoordicheyt der Priesteren ende des gantschen volcks, die in den huyse des Heeren stonden,

+ Ieremia.

6

^b Ende seyde, Amen: de Heere doe also: de Heere ^c bestedighe dijn woordt, dat du ghepropheteert hebst, dat hy de vaten wt den huyse des Heeren, van Babel wederbrenge aen dese plaetse, met tsamen allen gheuanghenen.

b Mich. 3.a.5.

c Dat is, Make stadtgrijpich, beuestighe.

7

Doch nu hoort oock dit woordt, dat ick voor dynen ooren spreke, ende voor den ooren des gantschen volcks.

8

De Propheten die voor my ende dy gheweest zijn, van oudts herwaerts, die hebben teghen vele Landen ende groote Koninckrijcken, ghepropheteert van krijghen, van ongheluck, ende van pestilencie.

9

^d Wanneer daerenteghen een Propheet van vreden propheteert, dien salmen kennen, oft hem de Heere warachtighen ghesonden heeft, wanneer zijn woordt veruullet wordt.

d Het zijn ghewislicken valsche Propheten, die lijflicken troosten, so de lieden doch boos zijn. Deut. 18.c.20.22. Num. 16.a.1.

B.10

Doe nam de Propheet Hanania ^e† het iock van den halse des Propheten Ieremia, ende verbrack het.

e† And. de keten

11

Ende Hanania sprack in teghenwoordicheyt des gantschen volcks, So spreeckt de Heere, Euen so wil ick verbreken het iock NebucadNezar des Konincks te Babel, eer twee Iaer omkomen, van den halse aller volcken: ende de Propheet Ieremia ghinck synes weechs.

12

Doch des Heeren woordt gheschiedde tot Ieremia, na dat de Propheet Hanania, het iock van den halse des Propheten Ieremia verbroken hadde, ende sprack:

13

Gaet henen, ende segghet Hanania, So spreect de Heere, Du hebst het houten iock verbroken, so maekt nu een ijseren iock aen ghenes stede.

14

Want so spreeckt de Heere Zebaoth, de God Israels, Een ijseren iock, hebbe ik alle desen

[fol. 31r]

volcken aen den hals ghehangen, daer sy mede dienen sullen, NebucadNezar den Koninck te Babel, ende moeten hem dienen: want ick hebbe hem oock de wilde dieren ghegheuen.

15

Ende de Propheet Ieremia sprack, tot den Propheet Hanania: ^f Hoort doch Hanania: de Heere heeft dy niet ghesonden, ende du hebst gemaeckt, dat hem dit volck op leughenen verlaet.

f Iere. 29.d.31.

16

Daerom spreeckt de Heere also, Siet, ick wil dy van den Aerdtbodem nemen: deses Iaers saltu steruen: want du hebstse met dyner reden, van den Heere afghewendet. Also sterf de Propheet Hanania, des seluen Iaers in der seuender Maendt.