Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat Lxi. Capittel.

1. Christus een Leeraer des Euangelij, 4. ordineert syne Leeraers ende Predickers, zijn boodtschap te voeren ouer de wijde wereldt, 7. met eener vertroostinghe ouer des Ampts vaerlicheydt, 10. vreuchde der Kercken ouer de ghenade door Christum verkreghen.

A.1

DE ^a Gheest des Heeren Heeren is ouer my, daeromme heeft my de Heere ghesalft: hy heeft my ghesonden den ellendighen te predicken, ^b de ghebroken herten te verbinden, te predicken den gheuanghenen een verlossinghe, den ghebondenen een ontbindinghe.

a Iesai. 11.a.2. Luc. 4.b.18. ende 7.c.22.

b Iesai. 57.b.15. ende 66.a.2. Psalm. 34.b.19. ende 51.b.19.

2

Te predicken een genadich Iaer des Heeren, ende eenen dach der wraecke onses Gods, ^c te troosten alle treurighen.

c Iesai. 66.b.10. Matth. 5.a.4.

3

Te beschaffen den treurighen te Zion, dat hen cieraedt voor asschen, ende vreuchdenolye voor treuricheydt, ende schoone kleederen voor eenen bedroefden gheest, ghegheuen worde, dat sy ghenoemt worden boomen der gherechticheyt, planten des Heeren, ten prijse,

[fol. 19r]

4

Sy sullen de oude verwoestinghe bouwen, ^d ende wat in voortijden verstooret is, oprichten: sy sullen de verwoestede steden, die ^† voort ende voort verstoort gheleghen hebben, vernieuwen.

d Iesai. 58.b.12.

† An. van geslachte tot gheslachte

5

Vreemde sullen staen, ende uwe kudden weyden, ende wtlanders sullen uwe ackerlieden ende wijngaerdeniers zijn.

6

^e Doch ghy sullet Priesters des Heeren heeten, ende men sal v Dienaers onses Gods noemen: ende ghy sullet der Heydenen goeden eten, ende v ouer harer heerlicheyt beroemen.

e Iesai. 66.c.21. Ierem. 33.c.21.

7

Voor uwe smaedtheydt sal v tweemael so vele komen, ende voor de schande, sullen sy vrolick zijn op haren ackeren: want sy sullen tweemael so vele besitten, in haren lande, sy sullen eewige vreuchde hebben.

8

Want ick ben de Heere, die het recht lief heeft, ende hate ^f roouische brandoffer: ende wil beschicken, dat haren arbeydt sal ghewis zijn, ende een eeuwich Verbondt wil ick met hen maken.

f Dat zijn alle Godsdiensten, die niet Gods eere en soecken, maer eyghen roem ende vreuchde.

9

Ende men sal haer zaedt kennen onder den Heydenen, ende hare ^g† nakomelinghen, onder den volcken: dat, wiese sien sal, salse kennen, dat sy een zaedt zijn, gheseghent van den Heere.

g† And. scheuten

B.10

^h Ick verheughe my in den Heere, ende mijn ziele is vrolick in mynen Gode: ⁱ want hy heeft my aenghetrocken met kleederen des Heyls, ende met den rocke der gherechticheyt ghekleedet: ghelijck als een Bruydegom in ^k Priesterlicken cieraedt vercieret, ende als een Bruydt schijnt in haren ghesmijde.

h Luc. 1.e.46.

i Psalm. 132.b.16.

k De Priesters waren heerlic ende doch eerbaerlick verciert: also is oock des Bruydegoms vercieringe niet hoonisch, maer eerlick: hy wil doch seggen, dat Christus te ghelijck Priester ende Bruydegom zy.

11

Want ghelijck als vrucht wt der Aerden wasset, ende zaedt in den houe opgaet: also sal gherechticheydt ende lof, voor allen Heydenen opgaen, wt den Heere Heere.