Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat Lvj. Capittel.

1. Uermaninge, datmen Christum, 3. die door zijn toekoemst, alle onderscheyt der persoonen wech neemt, met Godsalighen wandel ende leuen aennemen, 9. straffe valscher Leeraers.

[fol. 17v]

A.1

SO spreeckt de Heere: ^a Houdet het recht, ende doet gherechticheyt: want mijn Heyl is na by, dat het kome, ende myne gerechticheyt, dat sy gheopenbaert worde.

a Sapient. 1.a.1 Math. 3.a.2.

2

Wel dien mensche, die sulcks doet, ende dies menschen kindt, die het vast houdt: dat hy den ^b Sabbath houde, ende niet ontheylighe, ende houde zijn handt, dat hy niet quaets en doe.

b Iesai. 58.b.13.

3

Ende de vreemde, die hem tot den Heere gegheuen heeft, en sal niet segghen: ^c De Heere sal my scheyden van synen volcke: ende de ghesnedene, en sal niet seggen: Siet, ick ben een dorre boom.

c Deute. 23.a.1.

4

Want so spreeckt de Heere tot den ghesnedenen, ^d† die myne Sabbathen houden, ende verkiesen wat my wel behaecht, ende mijn Verbondt vast vaten,

d† An. Die

5

Ick wil hen in mynen huyse ende in mynen mueren, een plaetse gheuen, ende eenen beteren name, dan den sonen ende dochteren: ^e enen eewighen name wil ick hen gheuen, die niet vergaen en sal.

e Ioan. 1.b.12.

6

^f Ende der vreemden kinderen, die hen tot den Heere ghegheuen hebben, dat sy hem dienen, ende synen Name lief hebben, op dat sy syne Knechten zijn: een yeghelick die den Sabbath houdt, dat hy hem niet en onwijde, ende mijn Verbondt vast houdt:

f Sapient. 3.b.14

7

Deselue wil ick tot mynen Heylighen berch brenghen, ende wilse verheugen in mynen Bedehuyse: ende haren offer ende brandtoffer, sullen my aenghename zijn op mynen Altaer: ^g want mijn huys heet een Bedehuys allen volcken.

g 1.Reg. 8.e.41. Matth. 21.b.13. Marc. 11.b.17. Luce. 19.e.46.

8

De Heere Heere, die de verstooten wt Israel vergadert, spreeckt: Ick wil noch meer tot den hoope, die vergadert zijn, vergaderen.

9

Alle ghedierte op den velde, koemst ende verslint, Ia alle ghedierte in den woude.

B.10

^h Alle hare Wachters zijn blindt, sy en weten alle niets; stomme honden zijn sy, die niet straffen en konnen, zijn luye, ligghen ende slapen gheerne.

h Ierem. 12.b.10.

11

Het zijn dannoch stercke honden van lijue, die nemmermeer satt worden en konnen: sy de Herderen en weten gheen ⁱ verstandt, ^k een yegelick siet op synen wech, een yeghelick ghieret voor hemseluen in synen ^l† stande.

i Dat is, Gods woort.

k Ierem. 6.b.13.

l† And. plaetsen ofte palen.

12

^m Koemt herwaerts, latet ons wijn halen, ende ons vol suypen: ende hetsal morghen zijn, als heden, ende noch vele meer.

m Iesai. 12.b.13. Sapient. 2.a.6.