Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat Lv. Capittel.

1. Christus wordt allen menschen aengheboden, 6. warachtige boete, 10. ende kracht des Godlicken woordts, worden beschreuen.

A.1

VVelaen ^a alle ghy die dorstich zijt, koemt herwaerts ten water, ende ghy die gheen ghelt en hebt, koemt herwaerts, koopt ende etet: koemt herwaerts ende koopet, sonder ghelt ende om niet, beyde wijn ende melck.

a Ioan. 7.d.38. Syrach. 51.d.33. Apoca. 22.b.17.

2

Waerom tellet ghy ghelt henen, daer gheen broot en is, ende uwen arbeyt, dart ghy niet satt van worden en konnet? hooret my doch toe, ende etet het goede, so sal uwe ziele in wellust vett worden.

3

Neyghet uwe ooren herwaerts, ende koemt herwaerts tot my: hoort, so sal uwe ziele leuen: want ick wil met v een eewich Verbont maken, namelicken: ^b De ghewisse ghenade Dauids.

b Die Dauid toe gheseyt is. 2.Sam. 7.b.12. Actu. 13.d.34.

4

Siet, ick hebbe hem den lieden ten Getuyge ghesettet, ten Vorste ende Gebieder, den volcken.

5

Siet, du salst Heydenen roepen, die du niet en kenst, ende Heydenen die dy niet en kennen, sullen tot dy loopen, om des Heeren wille dijns Gods, ende des Heylighen in Israel, die dy prijset.

6

Soect den Heere, dewijle dat hy te vinden is, roept hem aen, dewijle dat hy na by is.

7

^c De Godloose late af van synen wege, ende de quaetdoender van synen ghedachten, ende bekeere hem tot den Heere, so sal hy hem syner ontfermen: ende tot onsen God, want by hem is vele vergheuinghe.

c Hesek. 18.c.27. ende 33.b.14. Psalm. 130.a.4.

8

Want myne ghedachten en zijn niet uwe gedachten, ende uwe wegen en zijn niet myne weghen, spreeckt de Heere.

9

Maer so vele den Hemel hoogher is, als de Aerde, so zijn oock myne weghen hoogher, als uwe weghen, ende myne ghedachten, als uwe ghedachten.

B.10

^d Want gelijck als den regen ende sneeu van den Hemel valt, ende daer niet weder henen koemt, maer vochtet de Aerde, ende maecktse vruchtbaer ende wassende, dat sy geeft zaet te zaeyen, ende broot te eten:

d Deute. 32.a.2.

11

Also sal het woordt, dat wt mynen monde gaet, ooc zijn: het en sal niet ledich weder tot my komen, maer doen dat my behaecht, ende sal hem wel ^e ghelucken, daertoe ick het sende.

e Of, slaen

12

Want ghy sullet in vreuchde wttrecken, ende in vrede gheleydt worden: berghen ende hueuelen sullen voor v henen vrolick zijn met roemen, ende alle boomen op den velde, met den handen klappen.

13

Dennen sullen wassen voor ^f† bosschen, ende Myrten voor doornen: ende den Heere sal eenen Name ende eewich teecken zijn, dat niet wtgheroeyet en wort.

f† And. hegghen