Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat Liiij. Capittel.

1. Christus troostet zijn Kercke, hy wilse weder te rechte brenghen, 3. ende gantsch wijdt wtbreyden, 7. wil synen toorne in eewicheydt van haer wenden, 11. haer met allerley kostlickheyt ende rijckdommen begauen, 14. ende voor allerley gheweldt ende onrecht beschermen.

A.1

ROemt ^a du onuruchtbare, die du niet en barest, verheucht dy met roemen ende iuychet, die du niet ^b swangher en bist: want de eensame heeft meer kinderen, dan die den man heeft, spreeckt de Heere.

a Luc. 23.c.29. Sapient. 3.b.13. Galat. 4.c.27.

b Of met kinde

2

Maeckt het ruym dyner hutten wijdt, ende breydet wt de tapijten dyner wooninge: spaertse niet: treckt dyne ^c reepen lanck, ende steeckt dyne naghelen vast in.

c Dat zijn, seelen of touwen,

3

Want du salt wtbreken ter rechter ende ter slincker zijden, ende dijn zaedt zal de Heydenen eruen, ende in den verwoesteden steden woonen.

4

Vreest dy niet, want du en salt niet te schanden worde: en wort niet bloode, want du en salt niet te spotte worden: maer du salt de schande dyner ^d Ionckvrouwschap vergheten, ende de smaedtheydt dyner weduweschap, niet meer gedencken.

d Dat du sonder kinderen, ende ellendich sonder man gheweest bist.

5

^e Want die dy ghemaeckt heeft, is dijn man, ^f Heere Zebaoth heet synen Name, ende dijn Verlosser de Heylige in Israel, die aller werelt God ghenoemt wort.

e Iesai. 62.a.4.

f Iesai. 48.a.2. Luc. 1.d.31.

6

Want de Heere heeft dy laten in gheruchte zijn, dat du zijst, als eene verlatene, ende van herten bedroefde vrouwe, ende als eene ionghe vrouwe, die verstooten is, spreekt dijn God.

7

^g Ick hebbe dy eenen kleynen oogenblic verlaten, doch met grooter barmherticheydt wil ick dy vergaderen.

g Psalm. 30.a.6.

8

Ick hebbe mijn aenghesicht in een ooghenblick des toorns een weynich van dy verborghen, doch met eewigher ghenade, wil ick my dyner ontfermen, spreeckt de Heere dijn Verlosser.

9

Want sulcx sal my zijn, ^h als het water Noah, doe ick swoer, dat de wateren Noah, niet meer souden ouer den Aerdtbodem gaen: ⁱ also hebbe ick ghesworen, dat ick niet op dy toornen, noch dy schelden en wil.

h Gene. 9.b.11.

i Samu. 7.b.14

B.10

Want berghen sullen wel wijcken, ende heuuelen veruallen: doch myne ghenade en sal niet van dy wijcken, ende het Verbont mijns vreets en sal niet veruallen, spreect de Heere dijn Ontfermer.

11

Du ellendighe, ouer welcker alle tempeesten gaen, ende du troostloose, siet, ^k ick wil dyne steenen als een ^l† cieraedt legghen, ende wil dynen grondt met Saphyren legghen.

k Iesai. 60.b.10.

l† And. met karbonckel onderlegghen,

12

Ende dyne vensteren van Crystallen maken, ende dyne poorten van Robynen, ende alle dyne lantpalen van wtuerkoren steenen,

13

^m† Ende alle dyne kinderen gheleert van den Heere, ende ⁿ grooten vrede dynen kinderen.

m† And. sullen etc. zijn etce. ende daer sal wesen oueruloedicheyt des vreets dynen sonen.

n Ioan. 6.e.45. Roman. 5.b.10. 1.Ioan. 2.a.1.2.3.

14

Du salt door gherechticheydt bereydet worden: du salt verre zijn van ghewelt ende ^o onrecht, dat du niet en doruest daer voor vreesen, ende daer van verschricken: want sy sal niet tot dy naken.

o Dat is, moedtwille saltu niet meer lijden.

15

^p† Siet, wie wil hem teghen dy vergaderen, ende dy oueruallen, so sy hen sonder my vergaderen?

p† And. Het sal hen een rot te samen slaen: doch niet wt my: wie hen binnen dynen palen teghen dy versamelt, sal vallen.

16

Siet, ick make het, dat de Smidt, die de kolen int vyer opblaest, een instrument daer van maeckt, tot synen ^q wercke: want ick make het dat de verderuer omkoemt.

q Dat is, dat hy hemseluen, ende de syne, ende niet dy en verderue.

17

Want alle instrument, dat teghen dy bereydet wordt, dien en salt niet ^r ghelucken: ^s ende alle tonghe, die haer teghen dy settet, saltu int gherichte verdoemen: dat is het erue der knechten des Heeren ende harer gherechticheydt van my, spreeckt de Heere.

r Of wel slaen.

s Luce. 21.b.15. Actu. 4.b.13. ende. 6.b.10.