Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat Liij Capittel.

Een eyghentlicke beschrijuinge des lijdens Christi, 7. met synen omstanden, 4. oorsaecken, 10. ende vruchten.

A.1

DOch ^a wie gelooft onser predickinghe? ende wien wordt den Arm des Heeren gheopenbaert?

a Ioan. 12.d.38 Roma. 10.b.16.

2

Want hy schiett op voor Hem, gelijck als een rijs, ende als een wortel wt dorren Aerdtrijcke: hy en heeft gheen ghestalt noch schoonheyt: wy saghen hem, doch daer en was gheen ghestalt, die ons behaecht hadde.

3

^b Hy was de aller verachtste ende onweertste, vol smerten ende kranckheyt: hy was so verachtet, datmen het aengesichte voor hem verbarch: daerom en hebben wy hem niet gheachtet.

b Marc. 9.b.12.

4

^c Voorwaer hy droech onse krancheydt, ende loedt op hem onse smerten: wy dannoch hielden hem voor dien, die geplaecht, ende van God geslaghen ende ghemartert ware.

c Matth. 8.b.17. 1.Pet. 2.c.24.

5

Doch hy is om onser misdaet wille verwondet, ende om onser sonden wille ^d verslaghen: de straffe leyt op hem, op dat wy vrede hadden: ende door syne wonden zijn wy gheheylet.

d Ofte, te morsel gheslaghen:

6

^e Wy ginghen alle dwalende, gelijck als Schapen, een yeghelijck sag op synen wech: doch de Heere werp onser aller sonden op hem.

e Psal. 119.y.177. 1.Pet. 1.c.25.

7

Doe hy ghestraft ende ghemartert wert, dede hy synen mondt niet op: ^f als een Lam dat ter slachtbanck geleydt wort, ende als een schaep, dat stom wort voor synen scheerder, ende synen mondt niet opdoet.

f Matth. 27.b.14. Ierem. 11.b.19. Actu. 8.d.32 Ioan. 1.c.29 1.Corinth. 5.a.7.

8

Hy is Ia wt den ^g† angste ende gherichte genomen: wie wil zijns leuens ^h tijdt wtspreken? want hy is wt den lande der leuendighen wech gheruckt, doe hy om der misdaedt wille mijns volcx, gheplaecht was.

g† And. kercker, an. sonder vertrec

h Luth. lengde, Lati generationem

9

ⁱ Ende hy is begrauen als de Godloosen, ende gestoruen als een ^k Rijcke: ^l hoewel hy niemant onrecht ghedaen heeft, noch eenighe bedriegherie in synen monde gheweest is.

i Matth. 27.g.60.

k Die zijn doen op rijcdom settet, dat is een Godlooser.

l 3.Corint. 5.c.21. 1.Petri. 2.c.22. 1.Ioan. 3.a.5.

B.10

^m Doch de Heere woude hem also ⁿ verslaen met krancheyt: wanneer hy zijn leuen ten schuldoffer ghegheuen heeft, so sal hy zaedt hebben, ende langhe leuen: ende des Heeren ^o voornemen, sal door zijn handt voort gaen.

m Ioan. 12.c.24, Roma. 8.d.32.

n Of, te morsel slaen

o Dat is, synen wille ende werc, dat hy in den, sinne heeft, namelicken, de verlossinge der menschen.

11

Daerom dat zijn ziele ghearbeydet heeft, sal

[fol. 17r]

hy synen lust sien, ende de volheyt hebben: ^p ende door syne kennisse sal hy, mijn knecht, de Rechtueerdighe, vele rechtueerdich maken: want hy draecht hare sonden.

p Rom. 3.c.24.

12

Daerom wil ick hem groote hoopen ter buete gheuen, ende hy sal de ^q stercken ten rooue hebben: daerom dat hy zijn leuen inden doot ghegeuen heeft, ^r ende den quaetdoenders ghelijck gerekent is: ende hy veler sonde ghedragen heeft, ende voor de ouertreders ghebeden.

q Coloss. 4.b.15.

r Marc. 15.c.28. Luc. 22.d.37.