Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xlvij. Capittel.

1. Omkomen der Babyloniers, 6. met oorsake derseluen, 12. daerse gheen Meester noch Toouenaers wt verlossen en konnen.

A.1

HIer onder ^a Ionckvrouwe du dochter Babel, settet dy in den stof, sette dy op de Aerde: want de dochter der Chaldeen, heeft gheenen stoel meer: men sal dy niet meer noemen: Du teerdere ende lustighe.

a Of, maghet

2

Neemt de Meulen ende malet meel: vlecht dijn vlechtsnoer wt, ontbloot den voet, ontdeckt de beenen, ^b† waedt door het water.

b† And op dat du door het etc gaest

3

^c Dat dyne schamelheyt ondecket, ende dyne schande ghesien worde: ick wil my wreken, ende gheen mensche en sal my afbidden.

c Hesek. 26.d.37. Nahum. 3.a.5.

4

[Sulcx doet] onse Verlosser, welcke heet de Heere Zebaoth, de Heylighe in Israel.

5

Settet dy in het ^d stille, gaet in de duysternisse, du dochter der Chaldeen: want du en salt niet meer heeten: Een Vrouwe ouer Koninckrijcken.

d Dat is, in den doot, ende in de nieticheyt.

6

Want doe ick op mijn volck toornich was, ende ontwijdde mijn erue, ouergaf ickse in dyne handt: ^e doch du en beweest hen gheen barmherticheyt, oock ouer de Ouden maecktestu dijn iock al te swaer,

e Prouer. 21.b.13. Ierem. 50.b.11.

7

Ende dachtest: Ick ben een Koninghinne eewichlick: du hebst sulcx sus langhe noch niet ter herten ghenomen, noch daer aen ghedacht, hoe het met hen hiernamaels worden soude.

8

So hoort nu dit, du die in wellust leefst, ende so seker sittest, ende sprekest in dyner herten: ^f Ick bent, ende gheen meer: ick en sal gheen weduwe worden, noch onuruchtbaer zijn.

f Iesai. 10.b.13. Apocal. 18.a.7.

9

^g Doch sulcx sal dy alle beyde haestighen komen, op eenen dach, ^h dat du weduwe ende onuruchtbaer zijst: Ia volkomelicken sullen sy ouer dy komen: om der veelheyt wille dyner Toouenaers, ende om dyner Besweerders wille, dier een groot hoop by dy is.

g Iesaie. 51.b.19. Apocal. 18.a.8.

h Danie. 5.d.30.

B.10

Want du hebst dy op dyne boosheydt verlaten, doe du dachtest: ⁱ Men en siet my niet: dyne wijsheyt ende konst, heeft dy ^k† ghestortet, ende sprekest in dyner herten: Ick bent, ende anders gheene.

i Iesaie. 29.b.15. Syrach. 23.c.25. Iob 22.b.13. Hesek. 9.a.9.

k† an. omgekeert, dat du sprakest in etc.

11

Daerom sal ouer dy een ongheluck komen, dat du niet en wetest, wanneer het opgaet, ende een ongheual sal op dy vallen, dwelck du niet versoenen en kanst: want daer sal haestelicken een rumoer ouer dy komen, dwelck du dy niet en versiest.

12

So treedt nu hier voor met dynen Besweerders, ende met de hoopen dyner Toouenaers, onder welcke du dy van dyner Ieucht op bemoeyet hebst: of du dy kondest ^l raden, of du dy mochtest stercken.

l Of, helpen,

13

Want du bist ^m moede, van veelheydt dyner aenslaghen: laett herwaerts treden ende dy helpen, de Meesters des loops des Hemels, ende de Sterrenkijckers, die na den ^n† Maenden rekenen, wat ouer dy komen sal.

m Dat is, So vele aenslaghen maken dy dwalende ende onsalich, dier doch niet een en deucht.

n† An. Manen

14

Siet, sy zijn alle stoppelen, die het vyer verbrandt: sy en konnen haer leuen niet verlossen voor der vlammen: want het en sal niet zijn een gloedt, daermen hem by warme: of een vyer, daer men rontom sitten moghe.

15

Also zijn sy, onder welcke du dy bemoeyet hebst, dyne handtteerders van dyner Ieughet op, een yegelick sal zijns weechs hier ende daer henen gaen, ende ^o† en hebst gheenen Hulper.

o† An. daer en sal gheenen Helper wesen.