Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxiiij. Capittel.

1. De Heere wreeckt zijn volck aen den Heydenen ende Ongheloouighen.

A.1

KOemt herwaerts ghy Heydenen, ende hoort: ghy volcken merckt op: de Aerde hoore toe, ende wat daer inne is, des werelts perck, met tsamen syner vrucht.

2

Want de Heere is toornich op alle Heydenen, ende grimmich op alle haer heyr: hy salse verbannen, ende totten slachten ouerleueren.

3

Ende hare verslaghene sullen wech gheworpen worden: dat den stanck van haren lichamen opgaen sal, ende de berghen van haren bloede vlieten.

4

^a Ende alle het ^* heyr des Hemels sal veruuylen, ende den Hemel sal te hoop gherollet worden, ghelijck als eenen brief, ende alle zijn heyr sal verwelcken, gelijck als een bladt verwelcket aen den wijnstock, ende als een dorre bladt aen den vijchboom.

a 2.Petr. 3.b.10.

* Heyr des Hemels heet hy hier het Iodische volc met haren Godsdienst, daer sy hen tegen andere Heydenen, als een Hemelsch volc, mede hielden.

5

Want mijn sweerdt is droncken in den Hemel, ende siet, het sal af varen op Edom, ende ouer het verbande volck, ter straffe.

6

Des Heeren sweerdt is vol bloedts, ende dicke van den vette, van den bloede der lammeren ende bocken, van der nieren vette wt den rammen: want de Heere houdt een slachten te Bozra, ende een groot worghen inden lande Edom.

7

Daer sullen de Eenhoornen met hen daer onder moeten, ende de ossen met den gemesteden ossen:

[fol. 11r]

want haer landt sal droncken worden van bloet, ende haer Aerde dicke worden van vette.

8

^b Want het is den dach der wrake des Heeren, ende het Iaer der vergheldinghe om Zion te wreken.

b Iesai. 63.a.4.

9

Daer sullen hare beken tot peck worden, ende haer Aerde tot sweuel: Ia haer lant sal tot brandende peck worden,

B.10

Dat noch des daechs, noch des nachts wtblusschen sal, maer eewichlick sal roock van haer op gaen: ende sal ^c† voort ende voort meer woest zijn, dat daer niemandt door gaen en sal in eeuwicheydt.

c† And. van gheslachte tot gheslachte

11

Maer ^d Roerdompen ende Swijneghels sullent in hebben, Nachtwlen ende Rauen sullen aldaer woonen: want hy sal een meetsnoer daer ouer trecken, dat sy woest worde, ende een richtloot, dat sy ledich zy.

d Putooren, and. Pellikanen ende Wlen. Zepha. 2.b.14.

12

Dat hare heeren heeten moeten: Heeren sonder landt, ende alle hare Vorsten een eynde hebben.

13

Ende daer sullen doornen wassen in hare palleysen, netelen, ende distelen in haren borghen, ende sal een wooninghe zijn der Draken, ende weyde voor de Struyssen.

14

^e Daer sullen door malcanderen henen loopen, ^f† Marters ende Ghieren, ende deen Veltduyuel sal den anderen ^g† ghemoeten: de ^h Kobolt sal oock aldaer herberghen, ende zijn ruste aldaer vinden.

e Iesai. 13.a.4.

f† And. Zihim ende Ohim

g† An. toeschreyen

h An. ongeheure Nachtvrouwe Thren. 4.a.3.

15

De ^i† Swijneghel sal oock aldaer nestelen ende liggen, broeden ende wthicken onder haer schaduwe: ooc sullen de ^k† Wouwen aldaer te samen komen.

i† And. Wle

k† And. Ghieren

16

^l Soecket nu in den boeck des Heeren ende leset: het en sal niet aen eenen derseluen feylen: men en misset oock niet, noch van desen, noch van dien: want hy isset, die door mynen mondt ghebiet, ende synen Gheest isset, die te samen brenghet.

l Deute. 28.

17

Hy gheeft het lott ouer haer, ende zijn handt deylet de mate wt onder haer: dat sy daer in eruen eewichlick, ende daer in blijuen ^m† voort ende voort.

m† And. van ouderdom tot ouderdom.