Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxij. Capittel.

1. Uan den welstande des Rijcx Hiskia, die een voorbeelde Christi is, 5. ende schadelicke Regimenten der dwaesachtigen, 9. der Ioden sekerheyt wort gestraft, 15. tot dat Christus zijn vreedtsame ende volghenoechsame Rijck aenrichtet.

A.1

SIet, daer sal een Koninck regeeren, om gherechticheydt aen te richten, ende Vorsten sullen heerschen, om het recht te hanthauen.

2

Dat een yegelick zijn sal, als een die voor den winde bewaert is, ende als een die voor den slachreghen verborghen is: als de waterbeken aen dorren plaetsen, als de schaduwe eens grooten rotzsteens in drooghen lande.

3

Ende der sienden ooghen en sullen haer niet blinden laten, ende de ooren der toehoorders, sullen opmercken.

4

Ende de onuersichtighen, sullen kloeckheyt leeren, ende der stamelende tonghe, sal veerdigen ende ^a reynlicken spreken.

a And. onderscheydentlicken

5

Een dwaes en sal niet meer Vorst heeten, noch een ghierighe, heere ghenoemt worden.

6

Want een sot spreeckt van sotheydt, ende zijn herte gaet met ongheluck om, op dat hy ^b huychelije aenrichte, ende predicke van den Heere dwalinghen: op dat hy de hongherighe zielen wthonghere, ende den dorstighen het drincken ^c weere.

b Dat is, gheueynstheyt

c Of, belette.

7

Want des ghierighen regeren, is enckel schade: want hy vindt ^d† nucken, om te verderuen de ellendighen met valschen woorden, wanneer hy des armen recht spreken sal.

d† An. listicheden

8

^e Daerenteghen de Vorsten sullen Vorstlicke ghedachten hebben, ende daer van houden.

e Prouer. 17.a.7.

9

Staet op ghy ^f† stoute vrouwen, hoort mijn stemme, die ghy so seker zijt, neemt ter ooren myne redenen.

f† an. rijcke, weeldighe an. die v ghesettet hebt,

B.10

Het is om Iaer ende dach te doen, so sullet ghy seker beuen: want daer en sal geenen wijnoogst zijn, so en sal daer oock gheen afplucken zijn.

11

Verschrickt ghy stoute vrouwen, beeft ghy sekere: daer is voorhanden wttrecken, blooten, ende gorden om de lendenen.

12

Men sal leedt draghen om den acker, Ia om de lieflicke ackeren, om de vruchtbare wijnstocken.

13

Want op den acker mijns volcx, sullen doornen ende distelen wassen: daertoe op allen vreuchden huysen in der vrolicker stadt.

14

Want de palleysen sullen verlaten zijn, ende de veelheyt in der stadt eensaem zijn, dat de torrens ende stercten eewighe speloncken worden, ende den ^g† wildtwercke ter vreuchde, den kudden ter weyde.

g† And. woudsezelen

[fol. 10v]

15

So lange, tot dat ouer ons wtghegoten worde, de Gheest wt der hoochte: ^h so sal dan de woestijne ten acker worden, ende de acker voor een woudt gherekent worden.

h Ioel. 2.c.22. Iesai. 29.b.17.

16

Ende het recht sal in der woestijne woonen, ende gherechticheyt op den ^† acker ⁱ huysen.

† An vruchtbaren lande woonen.

i Of, huys hebben.

17

^k Ende der gherechticheyt vrucht sal de vrede zijn, ende der gherechticheyt nutte, sal de eewige stilheyt ende sekerheyt zijn.

k Roma. 5.a.3.

18

^l Dat mijn volck in huysen des vreedts woonen sal, in sekeren wooninghen ende in stouter ruste.

l Ierem. 33.b.16.

19

^m† Doch hagel sal zijn den ⁿ woude henen af, ende de stadt daer beneden sal nederich zijn.

m† An. Maer den haghel, so hy valt, sal in het woudt ende in de stadt vallen. an. Maer den haghel sal afkomen op het wout: ende de stadt sal in nederige plaetsen geset worden.

n Ierusalem heet hy het woudt, daerom dat sy wt den woude Libanon ghebouwet is.

20

Wel v, ghy die saeyt alomme aen den wateren: want daer moecht ghy de voeten der ossen ende ezelen, op gaen laten.