Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxvj. Capittel.

1. Uertrouwen op God, brengt den Gheloouighen troost ende behoudinghe in allen haren iammer, 19. Item, van der verrijsenisse der dooden.

A.1

TE dier tijdt salmen sulck een Liedt singhen in den lande Iuda: ^{+ a} Wy hebben een stercke stadt, de mueren ende gheweeren zijn ^b Heyl.

+ Beschrijuinge der Kercken.

a Prouer. 18.b.10. Sachar. 2 a.5.

b Dat is, vaste ende onouerwinnelic.

2

^c Doet de poorten open, dat daer in gae het rechtueerdich volck, dat het gelooue bewaert.

c Psalm. 118.b.19.

3

Du onderhoudest alwech vrede, na gewisser toesegginghe: wantmen verlaet hem op dy.

4

Daerom verlatet v op den Heere eewichlick, want God de Heere is een rotssteen eewichlic.

5

^d Ende hy buyget de ghene die in der hoochte woonen, de hooghe stadt vernedert hy, Ia hy stootse ter Aerden, dat sy in den stof leyt.

d Iesai. 25.a.2.

6

Dat sy met voeten vertreden wordt, Ia met voeten der armen, met den [voet] treden der ^e slechten.

e Of, gheringen, snooden.

[fol. 8v]

7

^f Doch der rechtueerdigen wech is slicht: den padt der rechtueerdighen makestu richtich.

f Prouer. 16.a.9.b.17. Ierem.10.c.23.

8

Want wy wachten op den Heere, in den wech dijns rechts, des herten lust staet tot dynen Name ende dyner ^g ghedachtenisse.

g Dat is, tot dyner predike ofte woorde. Hoc facite in mei memoriam.

9

Van herten begeere ick dyner des nachts, daer toe met mynen gheeste in my, wake ick vroech tot dy: ^h† want waer dijn Recht in den lande gaet, so leeren de inwoonders des Aertrijcx gerechticheyt.

h† And. mits dat dyne rechten inden lande zijn, de inwoonders der werelt sullen gerechticheyt leeren.

B.10

Doch wanneer den Godloosen alreede ghenade aengheboden wordt, so en leeren sy doch gheene gherechticheydt: maer doen slechs quaet in oprechtighen lande: want sy en sien des Heeren heerlicheyt niet.

11

Heere, dijn hant is verhooghet, dat en sien sy niet: wanneer sy het doch sien sullen, so sullen sy te schanden worden, in de ijuer ouer de Heydenen: daertoe saltuse met vyere, daer du dyne vyanden mede verteerest, verteeren.

12

Doch ons Heere, saltu vrede schaffen: want alles wat wy ^i† hebben, dat hebstu ons gegeuen.

i† An. wtrichten

13

Heere onse God, daer heerschen wel andere heeren ouer ons dan du, nochtans wy dencken doch alleen dyner, ende dijns Naems.

14

De dooden en blijuen niet leuendich, de ghestoruene en staen niet op: want du hebtse te huys ghesocht ende verdelcht, ende te niete ghemaect alle hare ghedachtenisse.

15

Doch du Heere varest voort onder de Heydenen, du varest altoos voort onder den Heydenen: bewijsest dyne heerlicheyt, ende koemst verre tot aen der werelt eynde.

16

^k Heere, wanneer droeffenisse voorhanden is, so soectmen dy: wanneer du ^* tuchtighest, so roepen sy angstlicken.

k Leuit. 26.d.39.

* Oft, straffende onderwijsest

17

^l Ghelijck als een swangher vrouwe, wanneer sy schier baren sal, so is haer bange, schreyt in haren smerten: so gaet het ons oock Heere, voor dynen aenghesichte.

l Ioan. 16.c.21.

18

So zijn wy oock swangher, ende ons is banghe, dat wy kuym adem halen: noch en konnen wy den lande niet helpen, ende de inwoonders op den Aertbodem, en willen niet vallen.

19

^m Doch dyne dooden sullen leuen, ende met den lichame opstaen: waket op ende roemet, ghy die ligget onder der Aerden: want dynen dauw is eenen dauw des groenen veldts: doch het lant ^n† der dooden saltu neder werpen.

m 2.Corint 6.a.9 1.Corint. 15.b.13.

n† An. sal de dooden wt werpen, And. het lant der Reusen saltu tot eenen val trecken.

C.20

^o Gaet henen mijn volck, in de kamer, ende sluyt de deure na dy toe: verbercht dy eenen kleynen ooghenblick, tot dat den toorne voor by gae.

o Gene. 19.b.12. Apocal. 6.b.11.

21

^p Want siet, de Heere sal wtgaen van syner plaetse te huys te soecken de boosheydt der inwoonders des landts ouer haer: dat het landt sal openbaren haer bloet, ende niet langher verhelen, die daer in ^q verworcht zijn.

p Gene. 18.c.21. Michee. 1.a.3.

q Of, ghedoodt