Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxv. Capittel.

1. Een dancksegghinghe tot God, dat hy hem bewijst een Richter der wereldt, met straffen der boosen, ende behouden der Godureesenden, 6. met eener Propheete van der beroepinge der Heydenen, 10. ende wtroeyinghe der Kercken vyanden.

A.1

HEere du bist mijn God, dy prijse ick: ick loue dynen Name: want du doest wonder: dyne voornemen van oudts af, zijn ghetrouwe ende warachtich.

2

^a Want du makest de stadt tot steenhoopen, de vaste stadt, dat sy op eenen hoope leyt, der vreemden palleys, dat het niet meer een stadt en zy, ende nemmermeer ghebouwet en worde.

a Iesai. 26.a.5. ende 37.c.26. Ierem. 9.b.11.

3

Daerom eeret dy een machtich volck, de steden gheweldigher Heydenen vreesen dy.

4

Want du bist der ^b kleynen stercte, der armen sterckte in droeffenisse, een toeulucht voor den onweder, een schaduwe voor der hitte, wanneer de Tyrannen woeden, als een onweder teghen eenen wandt.

b Of, slechten, snooden, verachteden, gheringhen,

5

Du verootmoedighest der vreemden onstuymicheydt, ghelijck als de hitte in eener dorrer plaetse: dat de hitte de wijnrancken der Tyrannen verderue, ende de wolcke dannoch haer schaduwe gheue.

6

^c Ende de Heere Zebaoth, sal allen volcken maken op desen berghe een vette maeltijdt, een maeltijt van reynen wijne, van vette, van merch, van wijne daer gheenen ^d droesem in is.

c Matth. 22.a.2.

d Of, heffe

7

Ende hy sal op desen berghe, het ^e bewinden wech nemen, daer alle volcken mede bewonden zijn, ende het decksel daer alle Heydenen mede toeghedeckt zijn:

e Ghelijck als de dooden bewonden worden: dat is, hy sal de dooden leuendich maken.

8

^f Want hy sal den doodt gantsch verslinden ^g eewichlic: ende de Heere Heere, sal de ^h tranen van allen aenghesichten afwisschen, ende sal wech nemen de versmaedtheydt zijns volcks in allen landen: want de Heere heeft het gheseyt.

f Hosea. 13.b.14. 1.Corinth. 15.f.54.

g Apoca. 7.b.17. ende 21.a.4.

h S. Paulus 1.Corint. 15. bediedt het also: De doot is verslonden in der ouerwinninge, Dat is, de doot leyt, daer neder, ende heeft nu gheen macht meer: maer het leuen leyt bouen, ende spreect: Hier is de ouerwinninghe: waer bistu nu doot etc.

9

Te dier tijdt salmen segghen: Siet, dat is onse God, op dien wy wachten, ende hy sal ons helpen: dat is de Heere, op dien wy wachten, dat wy ons verheughen, ende vrolick zijn in synen Heyle.

B.10

Want de handt des Heeren rustet op desen berghe: ende Moab sal onder hem verdorschet worden, ghelijck als stroo verdorschet wordt, ende als dreck.

11

Ende hy sal syne handen midden onder haer wtstrecken, ghelijck als die een swemmer wtstreckt, om te swemmen: ende sal hare pomperije vernederen, met den armen syner handen,

12

Ende de hooghe ⁱ vesten uwer mueren buyghen, vernederen, ende in den stof ter Aerden werpen.

i Dit zijn de stercten der etc.