Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxiij. Capittel.

1. Straffe Tyri, 15. ende weder hare beroepinghe tot den Heere.

A.1

DIt is den last ouer ^a Tyrs: ⁺ Huylt ghy schepen op der Zee, want sy is verstoort, dat daer gheen huys meer en is, noch niemandt daer henen treckt: wt den lande ^b Chitim sullen sy dies ghewaer worden.

a Ierem. 47.a.4. Hesek. 26.a.2. ende 27.c.28.

+ Tyrus.

b Dat heeft ghedaen de groote Alexander wt Macedonia: so gantsch langhe te voren heeft Iesaia sulc dinck ghesien.

2

De inwoonders der Eylanden, zijn stille geworden: de kooplieden te Zidon, die ouer de Zee toghen, vulden dy.

3

Ende wat daer voor vruchten aen Sihor, ende koorne aent water wies, dat brachtmen tot haer in, ouer groote wateren: ende du warest der Heydenen Marckt gheworden.

4

Du machst wel verschricken Zidon; ⁺ want de Zee, Ia de aller vaste aender ^c Zee spreect: ^d† Ick en ben niet meer swanger, ick en bare niet meer, so en voede ick oock gheen Ionghelinghen op, ende en brenghe gheene maechden op.

+ Zidon.

c Dat is, Tyrus

d† And. D dat ick noyt van kinde gelegen, dat ick noyt ghebaert, dat ick noch ionghelinghen opgheuoedt, noch dochteren opgebracht en hadde.

5

Ghelijck alsmen verschrickte, doemen van Egypten hoorde: also salmen ooc verschricken, wanneermen van Tyro hooren sal.

6

Vaert henen op de Zee, huylet ghy inwoonders der Eylanden.

7

Is dat uwe vrolicke stadt, die haer haers ouderdoms beroemde? hare voeten sullense verre wech voeren te wandelen.

8

Wie hadde dat gemeynt, dat het Tyro der kroonen, so gaen soude? so doch hare kooplieden Vorsten zijn, ende hare Kremers de heerlickste in den lande?

9

De Heere Zebaoth heeft het also gedacht: op dat hy krenckede allen prael der lustiger stadt, ende verachtlic makede alle Heerlicken in den lande.

B.10

Waert henen door dijn landt, ghelijck als eenen stroom, du dochter der Zee; ^e daer en is gheen ^* Gordel meer.

e Hiob. 12.b.18.

* Gordel, dat is, gheen Regiment ende Ouericheyt.

11

Hy recket zijn handt ouer de Zee, ^f ende verschrickt de Koninckrijcken: de Heere ghebiedt ouer ^g† Chanaan, te verdelgen hare Machtigen,

f Danie. 2.c.21.

g† An. die marct,

12

Ende spreeckt: Du en salt niet meer vrolick zijn, du geschende Ionckvrouwe, du dochter Zidon; O ^h Chitim, maeckt dy op, ende treckt voort: want du en moest aldaer oock niet blijuen:

h Alexander moeste na Tyro, oock Babylon verstoren, an. maeckt dy op na Kitim, daer du oock gheen ruste salt hebben, Siet, dit volc en was voortijden niet wt der Chaldeen lande, maer et.

13

Maer in der Chaldeen lant, dat gheen volck en was: maer Assur heeft het aengerichtet, dat men daer schepet: ende hebben vaste torrens daer in opgherichtet, ende palleysen ghebouwet; doch sy is ghesettet, dat sy verstooret worden sal.

14

Huylet ghy schepen op der Zee, want uwe macht is verstoort.

15

Te dier tijt sal Tyrus vergheten worden, tseuentich Iaer lanck, so lange als een Koninck leuen mach: doch na tseuentich Iaren, salmen van Tyro een hoerenliedt singhen.

16

Neemt de harpe, gaet in de stadt rontom, du verghetene hoere: maeckt het goedt op het snarenspel, ende singt ⁱ flucx, op dat dyner weder gedacht worde.

i Of, lustich, fijn, wel,

17

^k Want na tseuentich Iaren, sal de Heere Tyrum te huys besoecken, dat sy weder kome tot haren hoerenloon, ende hoererije bedrijue met allen Koninckrijcken op Aerden.

k Actu. 21.a.3.

18

^l Doch haren koophandel ende ^m hoerenloon sullen den Heere heylich zijn: men en salse niet ten schatte vergaderen, noch verberghen: maer die voor den Heere woonen, sullen haer koopgoet hebben, dat sy eten, ende satt worden, ende wel bekleedt zijn.

l Psalm. 45.b.13.

m dat is, haren handel, dien sy in Afgoderije bedrijft.