Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxij. Capittel.

1. Straffe Ierusalems, 15. Sobna wort afgesettet, 20. ende Eliakim aen zijn stede inghesettet.

A.1

DIt is den last ouer den ^* Schouwdal: ⁺ Wat is v dan, dat ghy alle so op den daken loopet?

* Ierusalem heet hy het Schouwdal, daerom, dat sy vele Sienders, dat is, Propheten ende Leeraers in Gods woort hadden etc.

+ Schouwdal.

2

Du warest vol geruchts, een stadt vol volcx, een vrolicke stadt, dyne verslagenen en zijn niet met den sweerde verslagen, ende niet in den strijde ghestoruen.

3

Maer alle dyne Hooftlieden, zijn voor den boghe wech geweken ende gheuangen alle diemen in dy gheuonden heeft, die zijn geuangen, ende verre wech gheuloden.

4

Daerom segghe ick: ^a Maeckt v van my, latet my bitterlicken weenen: bemoeyet v niet, my te troosten, ouer de verstooringe der dochter mijns volcx.

a Ierem. 9.a.1. Luce. 19.e.41.

5

Want het is eenen dach des rumoers, ende der vertredinghe, ende verwerringhe van den Heere Heere Zebaoth in den Schouwdale, om des ondergrauens wille der mueren, ende des gheschreys aen den berghe.

[fol. 7v]

6

Want ^b Elam koemt daer henen met kokeren waghenen, lieden ende ruyteren, ende Kir ghelinstret daer henen met schilden.

b Dat zijn de Persen met de Chaldeen.

7

Ende het sal gheschieden, dat dyne wtuerkorene dalen sullen vol waghenen zijn, ende ruyters sullen hen legheren voor de poorte.

8

So dat den ^c voorhanck Iuda ontdeckt worden, datmen sien sal te dier tijt het ghereetschap in den huyse des woudts.

c Dat is, de schatkamer ende rusthuys, sal alle open zijn den vyanden.

9

Ende ghy sullet der reten aen der ^d stadt Dauids veel sien, ende ^e† sult het water in den ondersten waterloop vergaderen moeten.

d 2.Sam. 5.a.9.

e† And. ghy hebt vergadert de wateren van der onderste pissine,

B.10

Ghy ^f† sult oock de huysen te Ierusalem tellen; Ia ghy sult de huysen afbreken, om de mueren te beuestighen.

f† an. Hebt de huysen ghetelt, ende hebt Ierusalem etc. de huysen afghebroken, om de etc.

11

Ende ^g† sult een graf maken tusschen beyde mueren, van het water des ouden waterloops: noch en siet ghy niet op dien, die sulcx beschickt van verre tijden.

g† And. hebt een graf ghemaeckt.

12

Daerom sal de Heere Heere Zebaoth, te dier tijt beroepen laten, datmen weene ende klage, ende hem bescheere, ende sacken aentrecke.

13

Hoewel, siet, als nu isset enckel vreuchde ende hertenlust, ossen worghen, schapen slachten, vleesch eten, wijn drincken, [ende spreken:] ^h Latet ons eten ende drincken, wy steruen doch morghen.

h Also bespotten sy de Propheten, die hen den doot verkondighen, Iesai. 56.b.12. Sapien. 2.a.6. 1.Corint. 15.d.32.

14

Sulcx is voor de ooren des Heeren Zebaoth openbaer: wat gheldt het, of v dese misdaedt sal vergheuen worden, tot dat ghy sterft, spreect de Heere Heere Zebaoth.

15

So spreect de Heere Zebaoth: ⁺ Gaet henen in totten ^i† Schatmeester ^k Sebna den Hofmeester, [ende spreeckt tot hem:]

+ Sebna.

i† And. koorenmeester

k Iesai. 36.a.3.

16

Wat hebtstu hier? wien hoortstu toe? dat du dy een graf hier bouwen laetst, als die zijn graf in der hoochte houwen laet, ende zijn wooninghe in den rotzsteenen maken laett.

17

Siet, de Heere sal dy wech werpen, ghelijck als een sterck man eenen wech werpet, ende dy verstroyen:

18

Ende sal dy om drijuen, ghelijck als eenen beuselkloot op wijden lande: aldaer saltu steruen: aldaer sullen dyne kostelicke waghenen blijuen, met smaetheyt des huys dyner heeren.

19

Ende ick wil dy van dynen state storten, ende van dynen ampte wil ick dy setten.

C.20

Ende te dier tijt wil ick roepen mynen knecht Eliakim, ⁺ den sone Hilkia,

+ Eliakim.

21

Ende wil hem dynen rock aentrecken, ende met dynen gordel gorden, ende dyn gheweldt in zijn handt geuen: dat hy vader zy der ghener, die te Ieruzalem woonen, ende des huys Iuda.

22

^l Ende wil den ^m sleutel ten huyse Dauids, op syne schouderen legghen: dat hy opdoe, ende niemant toesluyte, dat hy toesluyte, ende niemandt opdoe.

l Hiob. 12.b.14. Apocal. 3.a.7.

m Dat hy schatmeester zy in dynen stede.

23

Ende wil hem ten ⁿ nagel steken aen een vaste plaetse, ende sal hebben den Stoel der eeren in zijns vaders huyse.

n Sacha. 10.a.4.

24

Datmen aen hem hange, alle heerlicheyt des huys zijns vaders, kinderen ende kindts kinderen, alle het kleyne ghereetschap, beyde drinckvaten ende allerley snarenspel.

25

Te dier tijdt spreeckt de Heere Zebaoth, sal den naghel wech genomen worden, die aen vasten plaetsen steeckt, dat hy breke ende valle, ende synen last omkome: want de Heere seyt het.