Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xx. Capittel.

1. Noch vander Egyptenaers met tsamen der Mooren straffe.

A.1

INden Iare doe Tharthan, te Asdod quam, ^a als hem Sargon de Koninck te Assyrien ghesonden hadde, ende krijchde tegen Asdod, ende wanse. ⁺

a Of, ghesonden zijnde van Sargon den Koninck van Assur etc.

+ Tharthan. Sargon.

2

Ter seluer tijdt, sprack de Heere door Iesaia den sone Amos, ende seyde: Gaet henen, ende treckt den ^b sack af van dynen lendenen, ende trect dyne schoenen wt van dynen voeten; ende hy dede also, ghinck naeckt ende baruoets.

b Dat is, dynen grouen rock, ofte wercdaechskleet.

3

Doe sprack de Heere: Gelijck als mijn knecht Iesaia naeckt ende baruoets gaet, ten teecken ende wonder van dry Iaer, ouer Egypten ende Moorenlant:

4

Also sal de Koninck te Assyrien henen drijuen de gheuanghen Egypten, ⁺ ende verdreuen Moorenlandt, beyde ionck ende oudt, naeckt ende baruoets, met blooter schamelheyt Egypten tot schande.

+ Egypten, Moorenlandt.

5

Ende ^c† sy sullen verschricken, ende met schanden bestaen, ouer den Moorenlande, daer sy hen op verlieten, ende wederom het Moorenlandt ouer den Egyptenaren, dier sy hen beroemden.

c† And. sy [de Ioden] sullen etc. verschricken ende ouer den Egyp. etc.

6

Ende de inwoonders deser Eylanden, sullen seggen ter seluer tijt: Is dat onse toeulucht, daer wy henen vloden om hulpe, dat wy verlosset worden dan den Koninck te Assyrien? hoe fijn zijn wy ontkomen?