Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)
(2009)–Anoniem Deux-Aes bijbel–
Auteursrechtelijk beschermd1. Straffe der Troglodijten, 7. beroepinghe derseluen tot den volcke Gods. | |
A.1VVee den lande, dat onder den Ga naar margenoota seylen in schaduwe vaert, op deze zijde der wateren des Moorlandts. | |
2Dat Ambasaden op de Zee sendt, ende in rietschepen op den wateren vaert; gaet henen ghy snelle boden totten volcke, dat verscheurt ende gheplondert is, totten volcke, dat grouwelicker is, dan sus eenich ander, totten volcke, dat hier ende daer wtghemeten ende vertreden is, dien de waterstroomen zijn lant innemen. | |
3Alle die ghy op Aerden woonet, ende ghy die in den lande sittet, sullet sien, hoemen de Baniere op den berghen opwerpen sal, ende hooren, hoemen de trompetten blasen sal. | |
4Want so spreeckt de Heere tot my: Ick wil stille houden, ende aensien in myner stede, ghelijck als een hitte, die den reghen wtdroocht, ende als meeldouwe in der hitte des Oogst. | |
5Want voor den Oogst sal de vrucht afnemen, ende de onrijpe vrucht in der bloeytijdt verdorren: datmen de stelen met sickelen moet afsnijden, ende de wijnrancken wech doen ende afhouwen. | |
6Datmen het tesamen moet laten liggen, den voghelen op den berghen, ende den ghedierten in den lande: dat des Somers de voghelen daer in nestelen, ende des Winters allerley ghedierte in den lande daer in ligghen. | |
7Te dier tijt, sal dat verscheurde ende geplonderde volck, dat grouwelicker is, dan sus eenich ander, dat hier ende daer afghemeten ende vertreden is, dien de waterstroomen zijn lant innemen, Ga naar margenootb† gheschencken brenghen den Heere Zebaoth, Ga naar margenootc aen de plaetse, daer de Name des Heeren Zebaoth is, tot den Berghe Zion. |
|