Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

1. Oorsake der Moabiteren straffe, is ontrouwe, onbarmherticheyt, ende hoochmoedighe stoutheyt.

A.1

LIeue schicket ghy ^a† Lantsheeren ^b lammeren van Sela, wt der woestijne, tot den berghe der dochter Zion.

a† And. het Lam, den Heerscher des landts, van, etc.

b Dat is, schikt offer na Ierusalem, of het helpen woude.

2

Doch ghelijck als een vogel daer van vliecht, die wt den neste ghedreuen wordt: so sullen zijn de dochteren Moabs, wanneer sy voor Arnon voorby trecken.

3

Vergadert raedt, houdt gherichte: maeckt dy schaduwen ders middaechs, ghelijck als eenen nacht: verbercht de veriaechden, ende en meldet de veltuluchtighe niet.

4

Laet myne veriaechde by dy herberghen; lieue Moab, weest du hare bescherminghe voor den verstoorder: so sal de drijuer een eynde hebben, de verstoorder ophouden, ende de ondertreder aflaten in den lande.

5

Daer sal Ia eenen Stoel bereydet worden wt genaden, dat daer een op sitte in der waerheyt, in der hutten Dauids, ende richte, ende pooghe na rechte, ende voordere gherechticheyt.

6

^c Wy hooren doch van den hoochmoede Moabs, dat hy gansch groot is, dat ooc haren hoochmoedt, stoutheydt ende toorne, grooter is dan haer macht.

c Ierem. 48.b.14.c.29.

7

Daerom sal deen Moabiter ouer den anderen huylen, altemael sullen sy huylen: ouer de fundamenten der stadt KirHareseth, sullen de verlemden suchten.

8

Want Hesbon is een woest veldt geworden, den wijnstock te Sibna is verdoruen; de heeren onder den Heydenen, hebben syne edele wijnrancken ^d verslaghen, ende zijn ghekomen tot Iaeser toe, ende trecken rontome in der woestijne: hare wijnrijsers zijn ^e† verstroyt, ende ouer de Zee gheuoert.

d Of, ontween, te morsel gheslagen,

e† And, wtghebreydet, so dat sy ouer de Zee quamen,

9

Daerom weene ick om Iaeser, ende om den wijnstock te Sibna, ende verghiete vele tranen om Hesbon ende Eleale: want daer is een ^f gesanck in dynen Somer ende in dynen Oogste gheuallen.

f Der vyanden geschrey in de stede dijns vrolicken gesancks.

B.10

Dat de vreuchde ende ^g hertenlust in den velde ophoudet, ende in den wijnberghen, iuychet noch en roeptmen niet: men en persset gheenen wijn wt in den wijnperssen: ick hebbe des gesancks een eynde ghemaeckt.

g Of, hertenvrolickheyt

11

Daerom ^h† rommelt mijn herte ouer Moab, gelijck als een harpe, ende mijn inwendige ouer KirHares.

h† And. klinckt mijn inghewandt ouer etc.

12

Als dan sal het openbaer worden, hoe Moab ⁱ moede is by den Altaren, ende hoe hy tot ^k† syner Kercken ghegaen zy om te bidden, ^l ende doch niets wtgherichtet hebbe.

i Dat hy hem seer bemoeyet heeft, sonder alle vrucht ende nut.

k† And. synen Heylichdom

l Deute. 32.d.37.

13

Dat isset, dat de Heere op dat mael teghen Moab ghesproken heeft.

14

Nu daerenteghen spreeckt de Heere ende seyt: In dry Iaren, gelijck als eens dachlooners Iaren zijn, sal de heerlicheyt Moab ^m kleyn worden, in der grooten veelheydt: dat gaer een weynich ouerblijue, ende niet vele.

m Of, ongheachtet, snoode