Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

1. De straffe Moabs.

A.1

DIt ^a is den last ouer Moab: ⁺ Des nachts koemt verstooringhe ouer Arin Moab: sy is daer henen: des nachts koemt verstooringe ouer Kir in Moab; sy is daer henen.

a Ierem. 48.a.1. Hesek. 25.a.8. Sepha. 2.a.8.

+ Cap. xvi. Luth. Moab.

2

Sy gaen opwaerts na Baith ende Dibon tot den Altaren, dat sy weenen, ende huylen ouer Nebo ende Medba in Moab; ^b aller hooft is beschoren, aller baert is ^c afghesneden.

b Ierem. 48.d.37 Hesek. 7.b.18. Actuum. 18.b.18.

c And. wtghewortelt.

3

Op haren straten gaen sy met sacken omgordet, op haren daken ende straten huylen sy alle, ende gaen weenende af.

4

Hesbon ende Eleale schreyen, datmen het tot Iahza hoort: daerom ^d karmen de ghewapende in Moab, want het gaet haren zielen qualick.

d And. weeklaghen

5

Myn herte schreyet te Moab: hare veltuluchtighen vlieden van der dryiarighe ^e koe, tot Zoar toe: want sy gaen na Luhith henen, ende weenen: ende op den weghe na Horonaum toe, verheft hem een iammergheschrey.

e Moab heet een dryiarighe koe, daerom, dat het een fijn landt ende rijck volck was: gelijc als een ionge koe vruchtbaer is, ende vele melck geeft.

6

Want de wateren te Nimrim verdrooghen, het hoy verdorret, ende het gras verwelcket, ende gheen groen kruyt en wasset.

7

Want het goet dat sy ghesamelt, ende het volck dat sy gherustet hebben, voertmen ouer de wilghen beke.

8

Een gheschrey gaet omme in de landtpalen Moab; sy huylen tot Eglaim toe, ende huylen by den ^f† bornput Elim.

f† an. tot in Beer Elim.

9

Want de wateren te Dimon zijn vol bloedts: daertoe wil ick ouer Dimon noch meer komen laten, beyde ouer die ^g† behouden zijn in Moab des ^h Leeuwen, ende ouer de ouerghebleuene in den lande.

g† And. ontloopen Ia achterwaerts: hy bespottetse also.

h De Leeuwen Moab, heet hy de groote hansen: ende wil segghen, dat beyde de heeren ende onderdanen, die haer ouerblijuen, sullen noch meer ongelucx hebben.