Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. Toekoemst Christi ende zijn Rijck, 7 omkomen der thien geslachten om haers wederspannicheyts ende moedtwillens wille, teghen God ende den naesten.

A.1

HEt volck dat in duysternisse wandelt, siet een groot licht, ^a ouer die, die daer woonen in ^b† duysteren lande schijnt het ^* heller.

a 2.Reg. 15.c.29.

b† An. in den lande der schaduwe des doots,

* Of, klaer.

2

Du makest der Heydenen vele, daer mede en maeckstu der vreuchden niet vele: ^c voor dy salmen Ia hem verheughen, ghelijck alsmen hem verheucht in den Oogst, ghelijck alsmen vrolick is, wanneermen de buete wtdeylt.

c Psalm 119.x.162 Prouer. 16.b.19.

3

^d Want du hebst het iock harer last, ende de roede harer schouderen, ende den stock haers drijuers gebroken, ^e gelijck als ter tijt Midian.

d Iesai. 17.b.12. ende 37.c.29.

e Iudic. 7.c.22. 1.Corinth. 15.c.24

4

^f† Want alle krijch met rumoer, ende een bloedich kleedt, sal verbrandt ende met vyere verteert worden.

f† And. Het gheschiet, tis waer alle krijch met oproerischer opmakinghe, ende ontreynighen der kleederen in den bloede, [dese doch] met branddende verteerende vyer.

5

^g Want ons is een kindt gheboren, een Sone is ons ghegheuen, welckers heerschappije is op syner schouder, ende hy heet, Wonderlic, Raet, ^h† Kracht, Heldt, Eeuwighe Vader, Vredevorst.

g Iesus Christus Luce. 1.d.31. Ioan. 3.b.16.

h† And God

6

ⁱ Op dat syne heerschappie groot worde, ende des vreets gheen eynde: op den Stoel Dauids, ende synen Konincrijcke: dat hy het bereide ende stercke, met gherichte ende gherechticheyt, van nu aen tot in eewicheyt: sulcks sal doen de ijuer des Heeren ^k† Zebaoth.

i Philip. 2.a.9. Danie 2.e.44. ende 7.b.14. Ioan. 12.d.34.

k† And. der heyrscharen.

7

De Heere heeft een woort ghesonden in Iacob, ende het is in Israel gheuallen.

8

Dat het sullen onderuinden alle het volck Ephraim, ende de burgheren te Samaria,

9

Die daer segghen in hoochmoet ende stouten

[fol. 4v]

sinne: Tichelsteenen zijn gheuallen, doch wy willent met ^l† werckstucken weder bouwen: men heeft ^m† moerbesienboomen afghehouwen, so willen wy Cederen aen die stede setten.

l† And. besneden steenen

m† And. wilde vijchboomen

B.10

ⁿ Want de Heere sal des Rezins krijchsvolck teghen hen verhooghen, ende hare vyanden te hoope rotten.

n 2.Reg. 16.a.9.

11

De Syriers van voren toe, ende de Philisteen van achter toe, dat sy Israel verslinden met vollen monde: ^o in alle dien en laet synen toorne noch niet af, zijn handt is nog wtghestreckt.

o Esai. 5.c.25. ende. 10.a.4.

12

Ooc en keert hem het volck niet tot dien, die het slaet, ende en vragen niets na den Heere Zebaoth.

13

Daerom sal de Heere afhouwen van Israel, beyde den kop ende den steert, beyde den stronc ende tack op eenen dach.

14

De oude eerlicke lieden, zijn den kop: doch de Propheten die daer valsch leeren, zijn den steert.

15

^p Want de Leyders des volcx zijn verleyders, ende die haer verleyden laten, zijn verloren.

p Ierem. 23.b.11.

16

Daerom en kan hem de Heere ouer haer ionghe ^q† mannenvolck niet verheughen, noch harer weduwen ende weesen ontfermen: want sy zijn altemael ^r huychelaers ende boos, ende aller mondt spreeckt dwaesheydt: ^s in alle dien en laet synen toorne niet af, zijn handt is noch wtghestreckt.

q† An. manschap

r Oft bewimpelaers

s Esaie. 5.c.25. ende 9.b.11. ende 10.a.4.

17

Want het Godloose wesen is aengegaen als vyer, ende verteert doornen ende ^t† distelen, ende brandt als in dicken woude, ende gheeft hooghen roock.

t† And. hegghen

18

Want in toorne des Heeren Zebaoth, is het landt verduystert, dat het volck is ghelijck als spijse des vyers: niemant en verschoont des anderen.

19

Roouen sy ter rechter zijden, so lijden sy hongher: eten sy ter slincker zijden, so en worden sy niet satt: een yeghelick verslint het vleesch zijns arms.

20

Manasse den Ephraim, Ephraim den Manasse, ende sy alle beyde te samen teghen Iuda: in alle dien en laet synen toorne niet af, zijn hant is noch wtghestreckt.