Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Uan beroepinghe der Heydenen, ende toekoemstighen vrede: door Christum, 6. van verwerpinghe der Ioden, ende oorsaecke derseluen.

A.1

DIt isset, dat Iesaia de sone Amoz sach, van Iuda ende Ierusalem.

2

^a Ter laetster tijdt sal de berch, daer des Heeren huys is, ^b ghewisse zijn, hoogher dan alle berghen, ende bouen alle kleyne berghen, verheuen worden: ende alle Heydenen sullen daertoe ^c loopen.

a Miche. 4.a.1.

b datmen niet hier ende daer en derf henen loopen, maer gewislic God aldaer vinden sal.

c Gelijck als water loopet met gewelt ende vrij vanselfs.

3

^d Ende vele volcken henen gaen, ende segghen: ^† Koemt, laet ons op den berch des Heeren gaen, ten huyse des Gods Iacobs: dat hy ons leere syne weghen, ende wy wandelen op syne paden: ^e want van Zion sal de Wet wtgaen, ende des Heeren woort van Ierusalem.

d Sachar. 8.c.20.

† Psalm. 122.a.1. Ierem. 31.a.6.

e Psalm. 50.a.2. Acta. 1.a.4.8.

[fol. 2v]

4

Ende hy sal richten onder de Heydenen, ende straffen vele volcken: ^f so sullen sy hare sweerden tot ploechijseren, ende hare spiessen tot sickelen maken: want gheen volck en sal teghen het ander een sweert opheffen, ende en sullen voort aen niet meer krijghen leeren.

f Ioel. 3.b.10. Mich. 4.a.3

5

Koemt ghy van den huyse Iacobs, latet ons wandelen in den lichte des Heeren.

6

Doch du hebst dijn volck, het huys Iacob laten varen: ^g† want sy bedrijuens meer, dan die teghen den opganck der Sonnen, ende zijn dachuerkiesers ghelijck als de Philisteen, ende maken der ^h vreemden kinderen vele.

g† And. om dat sy veruuldt zijn van den Oogsten, etc. Of vant gene dat voormaels gheweest heeft.

h Dat zijn kinderen der valscher leere ende Afgorije, die meer bygelooue hebben, dan de Heydenen teghent Oosten.

7

ⁱ Haer lant is vol siluers ende gouts, ende harer schatten en is gheen eynde: haer landt is vol peerden, ende harer waghenen en is gheen eynde.

i Deute. 8.b.13. ende. 17.b.16.17.

8

Oock is haer landt vol Afgoden, ^k ende bidden aen harer handen werck, dat hare vingeren ghemaeckt hebben.

k Iesai. 44.b.12.

9

Daer bucket hem de gemeyne man, daer verootmoedigen hen de Iunckeren, dat en saltu hen niet vergheuen.

B.10

Gaet in den rotzsteen, ende verbercht dy in der Aerden, ^l voor der vreese des Heeren, ende voor syner heerlicker Maiesteyt.

l 2.Thessa. 1.a.9.

11

Want alle hooghe ooghen sullen vernedert worden, ende wat hooghe lieden zijn, die sullen hen bucken moeten: de Heere daerenteghen sal alleen hooch zijn te dier tijt.

12

^m Want den dach des Heeren Zebaoth, sal gaen ouer alle het hoochmoedige ende hooghe, ende ouer alle het verheuene, dat het vernedert worde.

m Iesai. 5.b.14.

13

Oock ouer alle hooghe ende verheuene Cederen op den Libanon, ende ouer alle Eycken in Basan.

14

Ouer alle hooge berghen, ende ouer alle verheuene kleyne berghen.

15

Ouer alle hooghe torren, ende ouer alle vaste mueren.

16

Ouer alle schepen in der Zee, ende ouer allen kostelicken arbeyt.

17

Dat hem bucken moet alle hoocheyt der menschen, ende verootmoedighen wat hooghe lieden zijn, ende de Heere alleen hooch zy te dier tijdt.

18

ⁿ Ende met den Afgoden sal het gantsch wt zijn.

n Zepha. 2.b.11.

19

^o So salmen in der rotzsteenen holen gaen, ende in der Aerden klouen voor der vreese des Heeren, ende voor syner heerlicken Maiesteydt, wanneer hy hem opmaken sal, te verschricken de Aerde.

o Hosee. 10.a.8. Luce. 23.d.30. Apoca. 6.b.16. ende 9.a.6.

C.20

^p Te dier tijt sal een yeghelick wech werpen, syne silueren ende gulden Afgoden, (die hy hemseluen hadde laten maken om aen te bidden,) in de holen der Mollen ende Vledermuysen.

p Iesai. 31.a.7. Hesek. 20.e.43.

21

Op dat hy mach in de steenreten ende rotzklouen kruypen, voor de vreese des Heeren, ende voor syner heerlicken Maiesteydt, wanneer hy hem opmaken sal te verschricken de Aerde.

22

So latet nu af, van den mensche, die eenen adem in der neusen heeft: want ghy wetet niet, hoe hooch hy gheachtet is.