Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 215v]

Dat viij. Capittel.

A.1

O Dat ick dy, mijn broeder, die du myner moeder borsten sogest, daerbuyten vonde, ende dy kussen moeste, dat ^a† my niemandt ^b hoonede.

a† And. dy.

b Dat is, smaetheyt dede.

2

Ick woude dy leyden, ende in mijns moeders huys brenghen, daer du my leeren soudest: daer woude ick dy drencken met ghemaeckten wijn, ende met den most myner granaetappelen.

3

^c Sijn slincke hant leyt onder mynen hoofde, ende zijn rechterhant omhelst my.

c Cantic. 2.a.6.

4

^d Ick besweere v dochteren Ierusalems, dat ghy mijn beminde niet opwecket noch ^e opstueret, tot dat het haer selfs lustet.

d Cant. 2.a.7. ende 3.a.5.

e Of, opporret.

5

Wie is die, die daer op vaert vander woestijne, ende lenet haer op haren vriendt? onder den appelboom weckte ick dy, daer dyne moeder dy gheboren hadden, daer met dy gheleghen heeft, die dy ghegenereert heeft.

6

Settet my als eenen seghel op dijn herte, ende als eenen seghel op dynen arm: want de liefde is sterck als de doodt, ende ijuer is vaste als de Helle: haren gloet is vyerich, ende een ^f vlamme des Heeren.

f Hier siet men wel, dat Salomo in dit Liedt, van gheestlicker liefde singhet, die God gheeft, ende ons oock betoocht in alle syne weldaden

7

^g Dat oock vele wateren niet moghen de liefde wtblussen, noch de stroomen haer versuypen: wanneer eener alle goet in synen huyse, om de liefde gheuen woude, so golde het alles niet.

g Roma. 8.d.38.

8

Onse suster is kleyn, ende en heeft gheene borsten: wat sullen wy onser suster doen, wanneermense nu sal aenspreken?

9

Is sy eenen muer, so willen wy silueren bolwerck daer op bouwen: is sy een deure, so willen wyse beuestighen met cederen ^{h †} palen.

h Luth. balen,

† And. tafelen [dat is, schutwerck]

B.10

Ick ben eenen muer, ende mijn borsten zijn als torrens: daer ben ick gheworden voor synen ooghen, als die vrede vindet.

11

Salomo heeft eenen wijnberch te BaalHamon: ⁱ hy gaf den wijnberch den Hoederen, dat een yeghelick voor syne vruchten brachte duysent siluerlinghen.

i Matth. 21.d.33.

12

Mynen wijnberch is voor my: dy Salomo behoorender duysent, daerenteghen den Hoederen twee hondert, met tsamen synen vruchten.

13

Die du woonest inden Houen, laet my dijn stemme hooren: de gheselschappen mercken daer op.

14

Vliedt mijn vrient, ende zijt ghelijck een Rhee oft ionghen Herte, op den kruydberghen.

☞Eynde des Hooghen Liedts Salomo,