Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

A.1

HOe schoone is dynen ganck in den schoenen, du Vorsten dochter? dyne lendenen staen gelijck aen malcanderen, als twee spanghen, die de meesters hant ghemaect heeft.

2

Dynen nauel is als eenen ronden beker, dien nemmermeer dranck en ontbreect: dynen buyck is als eenen tarwen hoop, omme besteken met ^a† Roosen.

a† And. Lelien.

3

^b Dyne twee borsten zijn, als twee ionghe Rheetweelinghen.

b Cant. 4.a.5.

4

Dynen hals is als een elpenbeenen torren: dyne oogen zijn, als de dijcken tot Hesbon aen der poorte Bathrabbim: dynen neuse is als den torren op Libanon, die teghen Damascon siet.

5

Dijn hooft staet op dy, als Carmelus: het hayr op dynen hoofde, is als de purpur des Konincx in vouwen ghebonden.

6

^c Hoe schoone ende hoe lieffelick bistu, du lieue in wellusten.

c Cant. 2.b.15.

7

Dyne lengde is ghelijck eenen palmboom, ende dyne borsten den wijndruyuen.

8

Ick sprack, Ick moet op den palmboom klimmen, ende ^d† syne tacken grijpen: laet dyne borsten zijn, als druyuen aen wijnstocken, ende dyner neusen reuck, als appelen.

d† An. Twijgen. And. wipmeyen.

9

Ende dijn kele als goeden wijn, die mynen vrient glat inga: ende spreke vanden ouden.

B.10

Mijn vrient is myne, ende hy houdet hem tot my.

11

Koemt mijn vriendt: laet ons op het velt henen wtgaen, ende op de dorpen blijuen.

12

Dat wy vroech opstaen tot den wijnbergen: dat wy sien, oft den wijnstock bloeye, ende ^e oogen gekreghen hebbe: oft de granaetappelboomen wtgheslagen zijn, daer wil ick dy myne borsten gheuen.

e Cant. 2.b.13.

13

De ^f† Lelien geuen den reuck, ende voor onser deure zijn allerley edele vruchten: mijn vrient, ick hebbe dy beyde nieuwe ende oude behouden.

f† And. alraunen of mandragoren.