Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

A.1

SIet, mijn vriendinne, du bist schoone, siet, schoone bistu: dyne oogen zijn als duyuen ooghen, tusschen dyne ^a vlechten: ^b dijn hayr is, als de gheyten schare, die ^c† beschoren zijn op den berghe Gilead.

a Hy meynt de hayrtuyten, welcke na der natuerlicker oude wijse, ongheulochten ende te rugge geslagen, den wijfsbeelden seer wel staen: wanneer sy met vollen aenghesichte, ende rootachtige wangen daer wt sien, ende de hayren te beyden zijden daer af hangen, ouer de ooren ende schouderen.

b Cantic. 6.a.5.

c† An. daer glinsteren op den, etc.

2

^d Dyne tanden zijn als de kudde met besneden wolle, die wt der waschsteden komen, die altemael tweelinghen draghen, ende gheene onder hen is onuruchtbaer.

d Cant. 6.a.6.

3

Dyne lippen zijn als een roosenuerwich snoer, ende dyne reden lieffelick: dyne wanghen zijn als ^e† het afrijtsel aenden granaetappel, tusschen dynen vlechten.

e† And. een stuck

4

Dynen hals is als den torren Dauids, met borstweeren ghebouwet, daeraen duysent schilden hanghen, ende allerley wapenen der stercken.

5

^f Dyne twee borsten zijn als twee ionge Rhee tweelinghen, die onder de ^g† Roosen weyden.

f Cant. 7.a.3.

g† And. Lelien.

6

Tot dat den dach koudt wert, ende de schaduwe wijcke: ick wil ten Myrrhenberge gaen: ende ten wieroocksberchsken.

7

Du bist aller dinghen schoone, mijn vriendinne, ende daer is gheen vlecke aen dy.

8

Koemt myne bruyt van Libanon, koemt van Libanon: gaet henen in, treedt herwaerts vander hoochte Amana, vander hoochte Senir ende Hermon: vanden wooninghen der Leeuwen, vanden berghen der ^h† Leoparden.

h† And. Parden

9

Du hebst my het herte ghenomen, mijn suster, lieue bruyt, met dyne ooghen eene, ende met dyner halsketen eene.

B.10

Hoe schoone zijn dyne borsten, mijn suster, lieue bruyt: dyne borsten zijn lieffelicker dan wijn, ende den reuck dyner salue, ouertreedt alle kruyden.

11

Dyne lippen mijn bruyt, zijn als druppende honichseem, honich ende melck is onder dyner tonghen, ende dyner kleederen reuck, is als den reuck Libanon.

12

Mijn suster, lieue bruyt, du bist eenen besloten hof, een besloten bornspronck, eenen verseghelden bornput.

13

Dyne vrucht is als eenen lusthof van granaetappelen met edele vruchten, Cyperen met Nardus.

[fol. 215r]

14

Nardus met soffraen, kalmus ende kaneel, met allerley boomen des wieroocx, myrrhen ende aloes, met alle beste kruyden.

15

Als een hoffonteyne, als een fonteyne leuendigher wateren, die van Libanon vlieten.

16

Staet op Noordenwint, ende koemt Suydenwint, ende waeyet door mynen hof, dat syne kruyden druppen: ⁱ Mijn vrient kome in synen hof ende ete zijn edele vruchten.

i Cap. v. Pagu. Luth.