Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

A.1

ICk sochte des nachts in mijn bedde, dien mijn ziele lief heeft: ^a ick sochte hem, doch ick en vandt hem niet.

a Cant. 5.a.6.

2

Ick wil opstaen, ende inder stadt omme gaen, op de wijcken ende straten, ende soecken dien mijn ziele lief heeft: ick sochte hem, doch ick en vandt hem niet.

3

Het vonden my de wachters, die inder stadt om gaen: hebt ghy niet ghesien, dien mijn ziele lief heeft?

4

Doe ick een weynich hen voorby quam, daer vandt ick, dien mijn ziele lief heeft: ick houde hem, ende en wil hem niet verlaten, tot dat ick hem brenghe in myner moeders huys, in mijns moeders kamer.

5

^b Ick besweere v, ghy dochteren Ierusalems, by den Rheen ofte Hinden op den velde, dat ghy mijn vriendinne niet op en wert noch ^c opstuert, tot dat het haer selfs lustet.

b Cantic. 2.a.7. ende 8.a.4.

c Of, opporret,

6

Wie is die, die daer op gaet wt der woestijne, als eenen rechten roock, als een gheroock van myrrhen, wieroock, ende allerley puluer eens Apotekers?

7

Siet, rontomme het bedde Salomons, staen tsestich stercke, wt den Stercken in Israel.

8

Sy houden alle sweerden, ende zijn gheschict te strijden: elck heeft zijn sweert aen syner heupen, om der vreesen wille inder nacht.

9

De Koninck Salomo liet hem een ^d† bedstede maken, vanden houte wt Libanon.

d† And. palleys,

B.10

Der seluer ^e calumnen waren silueren, ^f† het voordeck gulden, het ghesitte purpuren, den bodem midden inne was lieffelick gheplaueyt, om der dochter wille te Ierusalem.

e Of, pilaren,

f† An. vloer, gulden, het gehemelte purpuren, inwendich int midden, is het beleyt met liefde der dochteren tot etc.

11

Gaet wt, ende schouwet aen, ghy dochteren Zion, den Koninck Salomo in der kroone, daer mede hem zijn moeder gekroont heeft, aen den daghe syner Hoochtijt, ende aen den daghe der vreuchden zijns herten.