Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

A.1

ICk ben een ^a† Bloeme te Saron, ende een Roose int dal.

a† And. lelie inden velde.

2

Als een Roose onder den doornen, so is mijn vriendinne onder den dochteren.

3

Als eenen appelboom onder de wilde boomen, so is mijn vrient onder de sonen: ick sitte onder de schaduwe diens ick begheere, ^b ende syne vrucht is myner kelen soete.

b Psalm. 119.l.103

4

Hy voert my inden wijnkelder, ende de liefde is zijn baniere ouer my.

5

^c† Hy verquickt my met bloemen, ende laeft my met appelen: want ick ben kranck van liefde.

c† And. Omlegt my met wijnuaten [and. druyuen] ende omsettet my, etc.

6

^d Sijn slincke hant leyt onder mynen hoofde, ende zijn rechterhant omhelst my.

d Cantic. 8.a.3.

7

^e Ick besweere v, ghy dochteren Ierusalems, by den Rheen ofte by den Hinden op den velde, dat ghy mijn vriendinne niet op en weckt, noch op en ^f stuert, tot dat het haer selue behaecht.

e Cantic. 3.a.5. ende 8.a.4.

f Of, opporret,

8

Dat is de stemme mijns vrients: siet, hy koemt ende huppelt op de berghen, ende springt op de kleyne berghen.

9

Mijn vrient is gelijck een Rhee oft een ionck Herte: siet, hy staet achter onsen wandt, ende siet door de vensteren, ende kijckt door de tralien.

B.10

Mijn vriendt antwoordet, ende spreeckt tot my: Staet op mijn vriendinne, mijn schoone, ende koemt herwaerts.

11

Want siet, de winter is verganghen, den reghen is wech ende daerhenen.

12

De bloemen zijn voortghekomen inden lande, ^g† Meytijt is daerby gekomen, ende de tortelduyue laet haer hooren in onsen lande.

g† And. sangtijt

13

De vijgheboom heeft knoppen ghekreghen, ^h de wijnstocken hebben ooghen ghewonnen, ende geuen haren reuck: staet op mijn vriendinne, ende koemt, mijn schoone koemt herwaerts.

h Cant. 7.b.10.

14

Mijn duyue inden rotzholen, inden ^i† steenscheuren: verthoont my dijn ghestalte, laet my hooren dijn stemme: want dijn stemme is soete, ende dijn ghestalte lieffelick.

i† And. gaten der trappen.

15

Vanget ons de vossen, de kleyne vossen, ^k die de wijnberghen verderuen: want onse wijnberghen hebben ooghen ghewonnen.

k Psalm. 80.b.14.

16

Mijn vrient is myne, ende ick ben syne, die onder den ^l† Roosen weydet.

l† And. Lelien.

17

Tot dat den dach koudt wordt, ende de schaduwen wijcken: keeret om, wordt als een Rhee mijn vriendt, ofte als een ionck Herte op den Scheydberghen.