Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xij. Capittel.

1. Somma ende besluyt deses boecks, Niets is vaste noch gheduerich dan alleen God, ende zijn gherichte, doorgaens van ieucht op voor ooghen hebben.

A.1

GHedenckt aen dynen Schepper in dyner ieucht, eer dan de boose daghen komen, ende de Iaren daertoetreden, wanneer du salt segghen: Sy en behaghen my niet.

2

^a Eer dan de Sonne ende het licht, de Mane ende de sterren, duyster worden, ende de wolcken weder komen na den reghen.

a Matth. 24.c.29. Iohel. 2.b.10. ende 3.b.15.

3

Te dier tijt, ⁺ wanneer de wachters inden huyse beuen, ende de stercken haer krommen, ende de mulders ledich staen, dat haerder so weynich gheworden is, ende de ghesichten duyster worden door de vensteren.

+ Met dese gebroken woorden, beschrijft hy het ouderdom eens menschen: wanneer de handen beuen, de beenen hen krommen, de ooghen doncker worden, de tanden niet wel en malen, de hayren grauwe worden, ende de schouderen haer bucken, de ooren hanghen ende doof worden, etc.

4

Ende de deuren op der straten toeghesloten worden, dat de stemme des mulderschen ^b lijselick wert, ende opwaket wanneer de voghel singhet, ende alle dochteren des ghesangs haer bucken.

b Of, heusch

5

Dat hem oock de hooghen vreesen ende ontsien op den weghe: wanneer den Amandelboom bloeyt, ende de sprinckhane beladen wort, ende alle wellust ophoudt (want de mensche vaert henen daer hy eewich blijft, ende de klaghers gaen rontom henen op der strate.)

6

Eer dan den silueren strick wech kome, ende de gulden bornspronck verloope, ende den Eemer wtleke aen den bornput: ende het rat verbreke aen den bornput.

7

^c Want het stof moet weder tot Aerde komen, als het gheweest is: ende den gheest weder tot Gode, dien ghegheuen heeft.

c Ecclesia. 3.c.20 Gene. 3.b.19.

8

^d Alle dinck is gantsch ijdel, sprack de Predicker, gantsch ijdel.

d Ecclesast. 1.a.2

9

Deselue Predicker en was niet alleene wijs, maer leerde oock den volcke goede leere, ende merckte, ende ondergrondede, ^e ende maeckte vele spreucken.

e 1.Reg. 4.d.32.

B.10

Hy sochte, dat hy vonde aenghename woorden, ende schreef recht de woorden der waerheyt.

11

^f Dese woorden der wijsen zijn spiessen, ende naghelen, gheschreuen door den Meester der Ghemeynten, ende van eenen Herder ghegheuen.

f Hebre. 4.b.12.

12

Hoedt dy mijn sone, voor anderen meer: want vele boecken makens, en is gheen eynde, ende vele predicken maeckt het lichaem moede.

13

Laet ons de Hooftsomme aller leere hooren: ^g Vreest God, ^h ende houdt syne gheboden: want dat behoort allen menschen toe.

g Apocal. 14.a.7. 4.Esdr. 16.g.68.

h Matth. 19.b.17.

14

ⁱ Want God sal alle werck voort Gherichte brenghen, ^k dat verborghen is, het zy goet ofte quaet.

i Matth. 12.d.36. Roma.14.b.10. 2.Corinth. 5.b.10.

k 1.Corint. 4.a.5.