Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxj. Capittel.

1

Dit zijn de woorden des Konincks ^a Lamuel: ⁺ die leere, die hem zijn moeder leerde.

a Heet, God by hem.

+ Dat is weder eene toesettinghe eens Konincks tot den Spreucken Salomonis.

2

OCh mijn wtuerkoorne: och du sone mijns lichaems: och mijn ghewunschede sone.

3

Laet den vrouwen niet dijn vermoghen, ende gaet den wech niet, daer hen de Koninghen in ^b verderuen.

b Als de ghene doen, die veriaecht oft verstecken worden, ofte anders schendtlicken omkomen.

4

O niet den Koninghen, Lamuel, gheeft den Koningen gheenen ^c wijn te drincken, noch den Vorsten stercken dranck:

c Syr. 19.a.2.

5

Sy mochten anders drincken, ende der rechten vergheten, ende veranderen erghens de saken der ellendighen lieden.

6

Gheeft stercken dranck, dien, die omkomen sullen, ^d ende den wijn den bedroefden zielen.

d Syr. 31.d.32. Psalm. 104.b.15.

7

Dat sy drincken, ende harer ellende vergheten, ende haers onghelucks niet meer en ghedencken.

8

Doet dynen mondt op voor de stummen, ende voor de sake aller, die ^e† verlaten zijn.

e† An. verdoruen

9

Doet dynen mondt op, ende richtet recht, ende wreket den ellendighen ende armen.

B.10

Aleph. ^f† Wien een deuchsaem wijf beschicket is, die is veel ^g edeler, als de kostelicke peerlen.

f† An. Wie sal etc. vinden etc. Prouer. 18.c.23. ende 19.b.14. Syr. 26.a.1.

g Dat is, Niet lieuers en is op Aerden, als vrouwen liefde, wien die kan te deele worden.

11

Beth. Haers mans herte derf hem op haer verlaten, ende ^h† neeringhe sal hem niet ontbreken.

h† An. roouen sullen etc. of, te roouen en sal hy geen noodt hebben.

12

Gimel. Sy doet hem goet ende geen quaet, alle zijn leefdaghe.

13

Daleth. Sy gaet met wolle ende was omme, ende arbeydet gheerne met haren handen.

14

He. Sy is gelijck als eens koopmans schip, dat syne neeringhe van verre brenghet.

15

Vau. ⁱ Sy staet des nachts op, ende gheeft haren huyse voeder, ende eten haren maechden.

i Dat is, Sy is rustich in den huyse.

16

Zayn. Sy dencket na eenen acker, ende koopt hem, ende plantet eenen Wijnberch, van den vruchten harer handen.

17

Heth. Sy gordet hare lendenen vast, ende stercket hare armen.

18

Thet. Sy mercket, hoe haren handel ^k vromen brenghet: hare ^† lanterne en blusschet ^l des nachts niet wt.

k Dat is, Sy verhoedet schade, ende merct, wat voordeel inbrenghet.

† And. keersse

l Dat is, In der noodt heeft sy troost.

19

Iod. Sy strecket hare handt na den spinrock, ende hare vingheren vaten de spille:

C.20

Caph. ^m Sy breydet hare handen wt tot den armen, ende recket hare handt den noodtdurftighen.

m Pro. 22.a.9.

21

Lamed. Sy vreeset haren huyse niet voor den snee: want haer gantsche huys heeft ^n† dobbel kleederen.

n† And. roosuerwighe

22

Mem. Sy maeckt haer seluen deckens: witte zijde ende purpur, is haer kleedt.

23

Nun. Haer man is beroemt in den poorten, wanneer hy sitt by den Ouersten des landts.

24

Samech. Sy maeckt eenen rock, ende verkoopt hem: eenen gordol gheeft sy den kramer.

25

Ayn. Haer cieragie is dat reyn ende vlijtich is, ^o ende sal hiernamaels lachen.

o Luc. 6.c.21.

26

Pe. ^p Sy doet haren mont op met wijsheyt, ende op harer tonghe is heylsame leere.

p Dat is, Sy onderwijset hare kinderen ende ghesinne fijn met Godes woordt, ende leeret hen tucht ende eere.

27

Zade. Sy schouwet, hoe het in haren huyse toe gaet, ende eett haer broodt niet met luyheyt.

28

Koph. Hare sonen komen op, ende prijsense salich, haer man loeftse.

29

Resch. Vele dochteren brenghen rijckdom te samen, doch du ouertreffestse alle.

D.30

Schin. Lieflick ende schoon zijn, is niets: ^q een vrouwe, die den Heere vreeset, salmen louen.

q Dat is, Een vrouwe, kan by haren manne, eerlick ende Godlick woonen, ende met goeder consciencie een huysurouwe zijn. Sy sal doch daerouer ende daerneuen God vreesen, aen hem gheloouen ende bidden.

[fol. 211v]

31

Thau. Sy sal ^q gheroemt worden van den vruchten harer handen, ende hare wercken sullense louen in den poorten.

q Of, ghepresen