Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxviij. Capittel.

A.1

DE ^a Godloose ^b vliedt, ende niemandt iaghet hem: de rechtueerdighe daerenteghen is vrijmoedich, als een ionck Leeuwe.

a Leuit. 26.d.36.

b Want de consciencie is meer, als duysent tuyghen. Wanneer God een lant straffen wil, so heeft het alleweghen nieuwe heeren.

2

Om des landts sonden wille worden vele veranderinghen der Vorstendommen: daerentegen om der lieden wille, die verstandich ende vernuftich zijn, blijuen sy langhe leuendich.

3

Een arm man die de ^c gheringhe beleedighet, is ghelijck als een meeldaw, die de vrucht verderuet.

c Dat is, armen, slechten, verachteden, verdrucket of leedt aendoet.

4

Die de Wet verlaten, louen den Godloosen: diese daerenteghen bewaren, die zijn onwillich op haer.

5

Boose lieden en mercken niet op het recht, ^d die daerenteghen na den Heere vraghen, die mercken op alle dinck.

d 1.Corin. 2.b.10.

6

^e Een arm man, die in syner vromicheyt henen gaet, is beter, dan een rijck man, die in verkeerden weghen gaet.

e Prouer. 19.a.1. Syr. 19.c.21.

7

Wie de Wet bewaert, dat is een verstandich kindt: wie daerenteghen slemmers voedet, die schendet synen vader.

8

Wie zijn goet vermeerdert met woecker ende ouersettinghe, ^f die vergadert het tot der armen nutte.

f Dat is, Die krijghen het, dien hy het niet toeghedacht en heeft.

9

^g Wie syne oore afwendet, te hooren de Wet, diens ghebedt is eenen grouwel.

g Prou. 1.c.24.

B.10

^h Wie de vromen veruoert op eenen boosen wech, die sal in synen kuyl vallen: daerenteghen de vromen sullen het goede eruen.

h 1.Reg. 18.b.18. Iere. 23.b.11.

[fol. 210v]

11

Een rijck man laet hem wijs duncken: doch een arm verstandich man, mercket op hem.

12

ⁱ Wanneer de rechtueerdighen de ouerhandt hebben, so gaet het seer fijn toe: wanneer daerentegen de Godloosen opkomen, so ^k† keeret hem om met den lieden.

i Eccle. 10.a.7. Pro. 28.c.28. ende 29.a.2.

k† And. worden de lieden ondertastet.

13

^l Wie syne misdaedt versaeckt, dien en sal het niet wel ^m gelucken: wiese daerenteghen bekent ende laet, die sal barmherticheyt verkrijghen.

l Hiob. 13.b.15. Psalm. 32.a.5.

m Of. slaen

14

Wel dien, die hem alleweghen vreest: wie daerenteghen halssterck is, die sal in ongheluck vallen.

15

ⁿ Een Godloose, die ouer een arm volck regeert, ⁺ dat is eenen brullenden Leeuwe ende gierighen ^o Beyre.

n Prouer. 19.b.12.

+ Tyrannische Ouericheyt is beswaerlic den onderdanen.

o Dani. 7.a.5. Syrac. 10.b.12.

16

Wanneer een Vorst sonder verstant is, so geschiet veel onrechts: wie daerenteghen de ghiericheyt hatet, die sal langhe leuen.

17

^p Een mensche, die aent bloet eener zielen onrecht doet, die en ^q† wordt niet behouden, wanneer hy schoon tot in de Helle voere.

p Gene. 4.b.10. ende 9.a.6.

q† And. sal tot in het graf [of put] vluchtich zijn, dat hen niemant wederhoude.

18

^r Wie vroomlicken henen gaet, die sal ghenesen: wie daerenteghen eens verkeerden weechs is, die sal op eenmael ^s† veruallen.

r Prouer. 10.a.9.

s† And. gantsch ontwee vallen.

19

^t Wie synen acker bouwercket, die sal broots ghenoech hebben: wie daerenteghen den ledichganghen nagaet, die sal armoede ghenoech hebben.

t Prouer. 12.b.11. Syrac. 20.d.30.

C.20

Een ghetrouwe man wordt vele gheseghent: ^{+ u} wie hem daerenteghen snelt rijck te worden, die en sal niet onschuldich blijuen.

+ Merct. Trouwe heeft broot ontrouwe lijdt noodt.

u Prouer. 13.b.11. ende 20.c.21. ende 23.a.4. 1.Tim. 6.a.9.

21

^x De persoonen aensien, en is niet goet: want hy doet qualick, oock wel om een stuck broodts.

x Deut. 1.b.17. ende 17.a.2. Iacob. 2.a.9. Prouer. 24.c.23.

22

Wie ten rijckdom haestet, ende is nijdisch, die en weet niet, dat hem ongheluck wederuaren sal.

23

^y Wie eenen mensche straffet, die sal daerna gonst vinden, meer dan die daer huychelt.

y Prouer. 27.a.5

24

^z Wie synen vader ofte moeder wat neemt, ende spreeckt, Het en zy gheen sonde: die is des verderuers gheselle.

z Matth. 15.a.5.

25

Een stoudt man verwecket twist: wie hem daerenteghen op den Heere verlaet, die wordt vett.

26

^a Wie hem op zijn herte verlaet, die is een dwaes: wie daerenteghen met wijsheyt henen gaet, die sal ontkomen.

a Iere. 17.a.5. Psalm. 49.a.7.

27

^b Wie den armen geeft, die en sal genen kommer lijden: wie daerenteghen syne ooghen afwendet, die sal seer afnemen.

b Deut. 15.a.4. Psalm. 112.a.5. Prouer. 11.c.24. 2.Corint. 9.a.6.

28

^c Wanneer de Godloosen opkomen, so verberghen hen de lieden: wanneer sy daerentegen omkomen, so wordt der rechtueerdighen vele.

c Prouer. 28.b.12. ende 29.a.2.