Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxv. Capittel.

A.1

DIt zijn ooc Salomonis Spreucken, die daer toe ghesettet hebben, de mannen Hiskia des Konincks Iuda.

2

HEt is Gods eere, een sake ^a verbergen: daerenteghen der Koninghen eere is het, een sake ondersoecken.

a In Gods regiment en sullen wy niet kloeck zijn, ende weten willen, waeromme? maer alle dinck gheloouen. Doch in wereldtlicken rijcke sal een heere weten ende vraghen, Waerom, ende niemande niets vertrouwen.

3

Den Hemel is hooch, ende de Aerde diep, doch der Koninghen herte, is ongrondelick.

4

^b Men neme den schuym van den siluer, so wordt daer een reyne vatt wt.

b Iesa. 1.c.22.

5

Men neme een Godloos wesen van den Koninck, so wordt synen throon met gerechticheyt beuesticht.

6

^c† Praelt niet voor den Koninghen, ende en treedt niet aen de plaetse der grooten.

c† an. Drijft geen ghepranghe oft prale etc. Prouer. 24.c.

7

^d Want het is dy beter, datmen tot dy segge, Treedt hier op: als dat du voor den Vorste vernedert wordest, dat het dyne oogen sien moeten.

d Luc. 14.b.10.

8

^e Vaert niet haestelick wt te twisten: ^f† want wat wiltu daerna maken, wanneer du dynen naesten gheschendet hebst?

e Syrach. 8.a.1. Matth. 5.c.25,

f† And. dat du velichte daer niet na en doest, daer dy dijn naeste mede te schanden make.

9

Handelt dyne sake met dynen naesten, ende en openbaert eens anderen heymlicheyt niet.

B.10

Op dat hy dy niet qualick na en spreke, die het hoort, ende dijn boose gheruchte nemmermeer ophoude.

11

Een woordt ghesproken te syner tijdt, is ghelijck als ^g gulden appelen in silueren schalen.

g Als Pomerantzen ende Citrin.

12

Wie eenen wijsen straffet, die hem luystert, dat is gelijck als eenen gulden voorhooftsbant ende gulden halsbandt.

13

Ghelijck als de koude des sneeus ter tijdt der Oogst, ⁺ also is een getrouwe bode, dien, die hem gesonden heeft, ende hy verquict zijns heeren ziele.

+ Een trouwe dienaer oft onderdaen en is niet te betalen.

14

^h Wie vele gelouet, ende en houdet niet, die is als een wolcke ende windt sonder reghen.

h Ghelijck als de werelt doet: Uele goede woorden, ende niets daerna.

15

ⁱ Door gheduldicheydt wordt een Vorst versoent: ende een vriendelicke tonghe breecket de hardicheyt.

i Prouer. 15.a.4. Iudic. 8.a.2. 1.Sam. 25.b.18.

16

Vindestu honich, so eett dies ghenoech: dat du niet te satt en wordest, ende spouwest het weder wt.

17

Trect dynen voet van den huyse dijns naesten: hy mochte dyner verdrietich ende dy gram worden.

18

^k Wie teghen synen naesten een valsche ghetuyghenisse spreeckt, die is een spiesse, sweerdt ende een scherpe pijle.

k Prouer. 19.a.5. ende 21.c.28. ende 24.c.28. Susan. g.62.

19

De hope des verachters ter tijdt der noodt, is ghelijck als eenen vuylen tandt, ende slibberende voet.

C.20

Wie eenen boosen herten liedekens ^l singhet, dat is ghelijck als een verscheurt kleedt in den winter, ende edick opt ^m† krijt.

l Want hy wordt doch ergher ende stouter daer door: ende met sulcken lieden isset (alsmen seyt) De eerste toorne de beste want hy en houdet doch niet op, tot dat hy ten laetsten een ongheluck aen richte.

m† And. salpeter And. seepe

21

ⁿ Honghert dynen vyandt, so spijst hem met broodt: dorstet hem, so drenckt hem met water.

n Rom. 12.c.20. 1.Sam. 30.b.11.

22

Want du salt kolen op zijn hooft hoopen, ende de Heere sal het dy verghelden.

23

Den Noordenwindt verdrijft den reghen, ende een suer sien, de heymelicke tonghen.

24

^o Het is beter, in den hoecke op den dake sitten, dan by eenen twistischen wijue, in eenen huyse te samen.

o Prouer. 21.a.9.b.19. Syrac. 25.c.23.

25

Een goedt gheruchte wt eenen verren lande, is ghelijck als koudt water, eener dorstigher ziele.

26

Een rechtueerdich mensche die voor eenen Godloosen valt, is als een beroerde fonteyne, ende verdoruen ader.

27

^p Wie te veel honichs eett, dat en is niet goet: ende wie swaer dinck ondersoeckt, ⁺ dien wordt het te swaer.

p Syrac. 3.c.22.

+ Te vele spreken, doet schade.

28

Een man die synen gheest niet houden en kan, die is ghelijck als een opene stadt sonder mueren.