Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxij. Capittel.

A.1

HEt ^a gheruchte is kostlicker dan grooten rijckdom: ende gunst is beter, als siluer ende goudt.

a Eccle. 7.a.1. Cantic. 1.a.3. Syrac. 41.b.15. Act. 16.a.2. 1.Macha. 2.f.51. Prouer. 27.b.12.

2

Rijcke ende armen moeten door malcanderen henen zijn: de Heere heeftse altemael gemaeckt.

3

De voorsichtighe siet het ongheluck, ende verberget hem: de onbesinneden gaen henen door, ende worden beschadicht.

4

Waermen lijdet in des Heeren vreese, daer is rijckdom, eere ende leuen.

5

Doornen ende stricken zijn op den wech des verkeerden: wie hem daer verre van maeckt, die bewaert zijn leuen.

6

^b Ghelijck alsmen eenen ionghen ghewennet, so laet hy daer niet van af, wanneer hy oudt wordt.

b Ionck gewent, oudt ghedaen. Prouerb. 20.b.11

7

De Rijcke heerschet ouer de Armen: ende wie borghet, die is des leeners knecht.

8

^c Wie onrecht saeyet, die sal moeyte maeyen, ende sal door de roede syner boosheyt, te niete worden.

c Hiob. 4.a.8. Galat 6.a.8.

9

^d Een goede ooghe wordt gheseghent: ^e want hy gheeft van synen broode den Armen.

d Dat is, Een milde mensche. Syrac. 31.c.28.

e Tobi. 1.b.17. ende 4.a.5.b.13.

B.10

Drijf den bespotter wt, so gaet het ghekijf wech: so houdet den twist ende smaetheyt op.

11

Wie een trouwe herte, ende lieflicke reden heeft, diens vriendt is de Koninck.

12

De ooghen des Heeren bewaren ^f goeden raedt: daerentegen de woorden des verachters, verkeert hy.

f Dat is, Wat noch goedes blijft in leeren ende raden, dat behoedet God: anders zijn der valschen monden so vele, dat alle goede raetslagen, verdoruen worden.

13

^g De luye spreeckt, Daer is een Leeuwe buyten: ick mochte verworcht worden op der strate.

g Dat zijn alle trage Predickers Regenten, gesinde, die den vos niet bijten en willen, ende gaen niet door dicke ende dunne.

14

^h Der hoeren mondt is eenen diepen kuyl: wien de Heere onghenadich is, die valt daerin.

h Prouer. 23.c.27.

15

ⁱ Dwaesheyt steeckt den ionghelinck int herte: doch de roede der tucht, salse verre van hem drijuen.

i Gene. 8.c.21.

16

Wie den Armen onrecht doet, op dat zijns goedts veel worde, ⁺ die sal oock eenen anderen Rijcken gheuen, ende noodt lijden.

+ Kinderstraffe.

17

Neycht dyne ooren, ende hoort de woorden der wijsen, ende neemt ter herten myne leere.

18

Want het sal dy saechte doen, so duse salt by dy behouden, ende sullen al te samen door dynen ^k mondt wel ghelucken.

k Dat is, Du salt dy ende anderen daer mede nutte zijn ende helpen.

19

Dat dijn hope zy op den Heere: ick moedt dy sulcks daechlicks vermanen, dy ten goede.

C.20

Hebbe ic het dy niet menichfuldichlick voorgheschreuen, met raden ende leeren?

21

Dat ick dy leerde eenen ghewissen grondt der waerheyt, dat du recht antwoorden ^l kondest, dien, die dy senden.

l Dat is, Dat du kanst met goeder consciencie seggen: Ia Heere, Het is gheschiet, wat du my beuolen hebst: want du weetst, dat het Gode wel behaecht, wat du doest na synen woorde.

[fol. 209r]

22

Berooft den armen niet, hoewel hy arm is: ende onderdruckt den ellendigen niet in der ^m poorte.

m Dat is, int gerichte: want in de poorten der stadt, plachmen tot gerichte te sitten.

23

Want de Heere sal hare sake handelen, ende sal hare ouertreders ondertreden.

24

ⁿ Ghesellet dy niet ten toornigen manne, ende en houdt dy niet tot eenen grimmigen manne.

n Syr. 8.b.19.

25

Du mochtest anders synen wech leeren, ende erghernisse dyner zielen daer van krijghen.

26

^o Weest niet by dien, die hare handt verknoopen, ende voor schuldt borghe worden.

o Prouer. 6.a.1. ende 11.b.15. ende 17.b.18.

27

Want so du het niet en hebst te betalen, so salmen dy dijn bedde onder dy wech nemen.

28

^p Drijf niet te rugghe de vorighen palen, die dyne vaders ghemaeckt hebben.

p Deut. 27.b.17. Prouer. 23.b.10. Iesa. 5.a.8. Trect niet tot dy, van eens anderen acker oft goede.

29

Sietstu eenen man rasch in synen wercke, die sal voor den Koninghen staen, ende en sal niet voor den onedelen staen.