Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xix. Capittel.

A.1

EEn ^a arm man, die in syner vromicheyt wandelt, is beter dan een verkeert man met syner lippen, die doch een dwaes is.

a Prouer. 28.a.6.

2

Waermen ^b niet met vernuft ^c† handelt, daer gaet het niet wel toe: ende wie snel is met den voeten, die doet schade.

b want een moet den anderen dulden.

c† An. verlanget,

3

De dwaesheyt eens menschen verleydet synen wech, dat zijn herte teghen den Heere woedet.

4

^d Goet maeckt vele vrienden: daerenteghen de arme wordt van synen vrienden verlaten:

d Prouer. 14.c.20

5

^e Een valsch ghetuyge blijft niet onghestraft: ende wie vrij leughenen spreeckt, die en sal niet ontkomen.

e Deut. 19.b.19. Prouer. 21.c.28. ende 24.c.28. ende 25.b.18. Susan. g.62.

6

Vele ^{f †} wachten op den persoon des Vorsten, ende zijn altemael vrienden, diens, die daer gheschencken gheeft.

f of, houden wacht ende acht.

† An. bidden ootmoedichlick voor den gaefrijcken.

7

Den armen haten alle syne broeders: Ia oock syne vrienden maken hen verre van hem: ende wie hem op woorden verlaet, dien en wordt niets.

8

Wie kloeck is, die ^h heeft lief zijn leuen: ende de verstandighe vindt wat goedts.

h Dat is, Hy hoedet hem voor vaerlicheyt, vertrouwet den menschen niet in haren woorden.

9

Een valsch ghetuyghe blijft niet ongestraft: ende wie vrij leugenen spreeckt, die sal omkomen.

B.10

Den dwase staet het niet wel, goede daghen hebben: veel weynigher eenen knecht, te heerschen ouer Vorsten.

11

Wie verduldich is, die is een kloec mensche: ⁱ ende het is hem eerlick, dat hy ondeuchde verhooren kan.

i Dat is, Wie wel verhooren kan, die wil wijs worden.

12

^k De ongenade des Konincks is, als het brullen eens ionghen Leeuwen: daerenteghen syne ghenade is, als dauwe op het gras.

k Prouer. 20.a.2. ende 28.b.15. Rom. 13.a.4.

13

^l Een dwaesachtich sone is zijns vaders hertenleedt, ^m ende eene twistische vrouwe, is een ghestadich druppen.

l Prouer. 17.c.25.

m Prou. 27.b.15.

14

Huys ende goedt eruen de ouders: ⁿ daerenteghen eene vernuftighe vrouwe, koemt van den Heere.

n Prouer. 18.c.23. ende 31.b.10. Syrac. 16.a.1.

15

Luyheyt brenghet slaep: ende een ledichgaende ziele, sal hongher lijden.

16

Wie het ghebodt bewaert, die bewaert zijn leuen: wie daerenteghen synen wech verachtet, ^o die sal steruen.

o Dat is, hy koemt meester Hanse in de handen, ende aen de galge: want onghehoorsaem kinderen ontloopen hem niet.

17

^p Wie hem der Armen ontfermt, die leent den Heere: ^q die sal hem het goede weder vergelden.

p Psalm. 112.a.5. ende 25.e.40.

q Matth. 10.e.42.

18

^r Tuchticht dynen sone, dewijl dat daer hope voorhanden is: ^s† doch laet dyne ziele niet bewoghen worden, hem te dooden.

r Dat is, straffende onderwijst.

s† And. ende van synen gheschrey laet dy niet bewegen in dyner herten.

19

Want groote grimmicheyt brenghet schade: daerom laet hem los, so kanstu hem meer tuchtigen.

C.20

Luystert den raedt, ende neemt aen de ^t tucht, dat du hiernamaels wijs zijst.

t Dat is, de straffende onderwijsinghe.

21

^u Daer zijn vele aenslagen in eens mans herte: doch den raedt des Heeren blijft bestaende.

u Prouer. 16.a.9.

22

Eenen mensche ^x† vercieret syne weldaet: ende een arm man is beter, dan een leughenaer.

x† And. lustet

23

De vreese des Heeren vordert ten leuen: ende sal satt blijuen, dat hem geen quaet te huys soecken en sal.

24

^y† De luye verbercht syne hant in den boesem, ende kanse niet weder ^z ten monde brenghen.

y† And. De luye etc. in de schotel etc Prouer. 16.b.15.

z Gelijck alsmen spreeckt, Hy is so luye, dat hy van luyheyt niet eten mach, wanneer hy schoon de hant in der schotel, oft het eten voor hem heeft. Dat zijn leeraers, regerers, gesinne etc. die haer ampt verlaten, hoewel sy het doch lichtelic konnen wtrichten

25

^a Slaetmen den bespotter, so wordt de onbesinnede voorsichtich: straftmen eenen verstandighen, so wordt hy vernuftich.

a Prouer. 21.b.11.

26

Wie den Vader verstoort, ende de moeder veriaecht, die is een schendich ende veruloeckt kindt.

27

Laet af mijn sone, te hooren de ^* tucht, die daer afuoert van vernuftigher leere.

* Dat is onderwijsinghe

28

Een valsch ghetuyghe bespottet het gherichte: ende der Godloosen mondt verslindet het onrecht.

29

Den ^b bespotters zijn straffen bereydet, ende slaghen op der dwasen rugghe.

b De onghehoorsamen loose boeuen, moet de Hencker straffen, daertoe komen sy ghewisse.