Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvij. Capittel.

A.1

EEnen ^a drooghen bete, daermen hem aen genoegen laet, is beter, dan een huys vol gheslachts vees met twiste.

a Prouer. 15.a.8. ende 16.a.8. Eccle. 4.a.6. Syrac. 29.d.30.

2

^b Een kloeck knecht sal heerschen ouer ^c† onulijtige eruen, ende sal onder den broederen het erue wtdeylen.

b Syrac. 10.c.28.

c† An. den schentlicken sone in den huyse,

3

Ghelijck als ^d† het vyer het siluer, ende den ouen het goudt: also proeuet de Heere de herten.

d† And. de smelter

4

Een boos mensche achtet op boose monden: ende een valsch mensche hoort gheerne de schadelicke tonghen.

5

^e Wie den armen bespottet, die hoont des seluen Schepper: ^f ende wie hem zijns ongheuals verheucht, die sal niet onghestraft blijuen.

e Prouer. 14.d.31. Psalm. 7.b.10. ende 17.a.3. ende 66.b.10. Sapient. 3.a.5. Syrac. 2.a.5.

f Hiob. 31.c.29. Psalm. 35.b.15. Prouer. 24.b.17.

6

Der ouden kroone, zijn kindts kinderen: ende der kinderen eere zijn hare vaders.

7

Het en staet eenen sotten niet wel, van hooghen dinghen te spreken: veel weynigher eenen Vorst, dat hy gheerne liecht.

8

Het gheschenck is een ^g† Edel steen, ⁺ dien, die het heeft: waer hy hem henen wendet, is hy kloeck gheachtet.

g† An. Een steen der gonste dien etc tot wien dat het koemt, dien bedooret. And. alles daer het toe koemt, laet het wel gelucken.

+ Een oudt eerlick gheslachte is te louen.

9

^h Wie de sonde bedecket, die maeckt vriendtschap: wie daerenteghen de sake weder ende weder ⁱ meldet, die maeckt de Vorsten oneens.

h Prouer. 10.b.12.

i Dat is, wederhaelt, weder aentooget, weder vernieuwet etc.

B.10

Schelden verschricket meer aen den verstandighen, dan hondert slaghen aen den sotten.

11

Een bitter mensche ^k† pooget schade te doen: doch eenen grouwelicken Enghel sal ouer hem komen.

k† And. trachtet

12

Het is beter eenen beyre ontmoeten, dien syne ionghen berooft zijn, dan eenen sotte in syner dwaesheyt.

13

^l Wie goet met quaden betaelt, van dies huyse, sal het quade niet aflaten.

l Deut. 32.d.35. Prouer. 20.c.22. 1.Sam. 24.b.18. 2.Sam. 12.a.9. Rom. 12.b.17. 1.Thess. 5.b.15. 1.Pet. 3.a.9.

14

Wie twist beghint, is ghelijck als die den watre den dam opschuert: laet du af van den twiste, eer du daerin ghemenghet werst.

15

^m Wie den Godloosen recht spreeckt, ende den rechtueerdighen verdoemt, die zijn alle beyde den Heere eenen grouwel.

m Iesa. 5.c.23.

16

Wat sal den dwase gheldt in der handt wijsheyt te koopen, so hy doch een dwaes is?

17

Een vriendt heeft alle tijdt lief: ende ^n† een broeder wordt in der noodt bekendt.

n† And. in der noodt wert hy dijn broeder.

18

^o Het is een dwaes, die in de handt gheloeft, ende borghe wordt voor synen naesten.

o Prouer. 6.a.1. ende 11.b.15. ende 20.b.16.

19

Wie twist lief heeft, die heeft sonde lief: ende wie syne deure hooch maeckt, die staet na ongheluck.

C.20

Een verkeert herte vindt niets goedts: ende die van eener verkeerden tonghe is, sal in ongeluck vallen.

21

Wie eenen sot genereert, die heeft treuricheyt: ende eens sotten vader, heeft gheene blijschap.

22

^p Een vrolick herte maeckt het leuen lustich: daerenteghen eenen bedroefden moedt, verdorret de ghebeenten.

p Prouer. 12.c.25. ende 15.b.13. ende 22.c.24. Syrac. 30.d.31.

23

^q De Godloose neemt heymlick gheerne gheschencken, om te buyghen den wech des rechts.

q Exod. 23.a.8.

24

^r Een verstandighe ghebeert wijslick: daerenteghen een ^{s †} sot, werpt de ooghen ghins ende weder.

r Eccle. 2.b.14. ende 8.a.1. Syrac. 2.b.14.

s Dat is, Hy heeft een wilt ghebeer.

† And. der sotten ooghen sweuen op der wereldt eynde.

25

^t Een dwaesachtich sone, is zijns vaders treuren, ende bedroeffenisse syner moeder, die hem ghebaert heeft.

t Prouer. 15.c.20. ende 19.b.13. ende 29.b.15.

26

Het is niet goet, datmen den rechtueerdighen schendet, ende den Vorst te slaen, die daer recht regeert.

27

^u Een vernuftich man, die matighet syne reden: ende een verstandich man is een ^x dierbaer ziele.

u Iacob. 1.b.16. Syrac. 5.b.13.

x Dat is, weerde, edele etc.

28

^y Wanneer een dwaes sweghe, so werde hy oock wijs ghehouden, ende verstandich, wanneer hy den mondt toe hielde.

y Hiob. 13.a.5.