Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

A.1

EEn wijs sone, laet hem den vader tuchtigen: daerentegen een bespotter, luystert der straffe niet.

2

Der vrucht des mondts ghenietmen: daerenteghen de verachters ghedencken slechs te moet willen.

3

^a Wie synen mondt bewaert, die bewaret zijn leuen: wie daerenteghen met synen monde daerwt vaert, die koemt in ^b verschricken.

a Prouer. 12.b.13. ende 2.c.23.

b Dat is, Uaer ende straffe.

4

^c De luye begheert ende krijcht het doch niet: daerenteghen de vlijtighen krijghen ghenoech.

c Prouerb. 6.a.6.

5

De rechtueerdighe is der leughenen vyandt: daerenteghen de Godloose schendet ende hoont hem seluen.

6

De gherechticheyt bewaert den onschuldighen: daerenteghen het Godloos wesen, brenghet eenen ter sonde.

7

Menighe is arm by grooten goede, ende menighe is rijcke by syner armoede.

[fol. 206v]

8

^d Met den rijckdom kan eener zijn leuen verlossen: daerentegen een arm man hoort ^e het schelden niet.

d Hiob. 2.a.4.

e Dat is, Eenen rijcken scheldet men: maer men gheeft hem omme ghelt los: een arm moet het houden: wie niet ghelt en heeft, die betale met der huydt.

9

Het licht der rechtueerdighen maket vrolick, daerenteghen de ^f kersse der Godloosen sal wtgaen.

f Prouer. 24.c.20. Hiob. 18.a.5. ende 21.b.17. ende 38.b.15.

B.10

Onder den stouten is altoos twist: daerenteghen de wijsheyt maket vernuftighe lieden.

11

^g Rijckdom wordt ^h kleyn, wanneer men hem vergiet: watmen daerenteghen tesamen houdt, dat wordt groot.

g Prou. 20.c.21. ende 28.c.20.

h Of, smal, dunne.

12

Die hope die haer vertreckt, angst het herte: wanneert daerenteghen koemt datmen begheeret, dat is eenen boom des leuens.

13

ⁱ Wie het woort verachtet, die verderuet hem seluen: wie daerentegen het ghebot vreeset, dien wordt het vergolden.

i Matth. 24.e.48.

14

^k De leere des wijsen is een leuendighe fonteynader, te vermijden de stricken des doots.

k Prouer. 14.c.27

15

Eenen goeden raedt doet sachte: daerentegen der verachters wech, brenghet wee.

16

Een voorsichtich man doet alle dinck met vernuft: daerenteghen de dwaes breydet de dwaesheyt wt.

17

Een Godloos bode ^l† brengt ongeluck: daerentegen een ghetrouwe ^m weruer, is heylsaem.

l† And. valt in schade:

m Of, voorbode,

18

ⁿ Wie de tucht varen laet, die heeft armoede ende schande: wie hem gheerne straffen laet, die sal tot eeren komen.

n Prouerb. 12.a.1.

19

Wanneert koemt datmen begheert, dat doet het herte saechte: ^o daerenteghen die het boose vermijdet, die is den dwasen eenen grouwel.

o Sapient. 2.b.15. Prouer. 29.c.27.

C.20

Wie met den wijsen omgaet, die wert wijs: wie daerenteghen der sotten gheselle is, die sal ongheluck hebben.

21

^p Ongheluck veruolghet de sondaers: daerenteghen den rechtueerdigen wordt het goede vergolden.

p Matth. 25.d.34.

22

De goede sal eruen op kindts kindt: daerenteghen der sondaers goedt, werdt den rechtueerdighen voor ghesparet.

23

Daer is vele spijse in den voren der ^q armen: daerenteghen die onrecht doen, verderuen.

q Dat is, God gheeft den armen ghenoech, so sy vroom zijn.

24

^r Wie syne roede spaert, die hatet synen sone: wie hem daerenteghen lief heeft, die tuchtighet hem terstont.

r Prou. 22.b.15. ende 23.b.13. Syrach. 30.a.1. Hebre. 12.a.7.

25

^s De rechtueerdighe eett, dat zijn ziele ^t satt wordt: daerentegen der Godloosen buyck heeft nemmermeer ghenoech.

s Psalm. 34.b.10.

t Dat is, Hy laet hem ghenoeghen.