Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. De wijsheyt voordert alle menschen tot haer, 8. leert der spotters ende wijsen onderscheydt in der straffe, 13. ende hoe de doorheyt (die hy onder der persoone eenes klapachtighen onwijsen wijfs beschrijft) de onbesinnede wereldt veruoert.

A.1

DE Wijsheyt bouwede haer huys, ende hieuwe seuen ^a† calomnen.

a† And. pijlaren.

2

Slachtede haer vee ende ende droech haren wijn op, ende bereydde haren disch.

3

Ende sandt hare maechden wt, te nooden bouen op den Palleyse der stadt.

4

Wie ^b† slecht is, die make hem hier toe, ende ten sotten sprack sy:

b† And. onbesinnet [of onberichtet] ende doorhaftich is, die etc. ende sprack tot yegelicken, Koemt etc.

5

Koemt, teert van mynen broode, ende drincket des wijns, dien ick schencke.

6

Verlaet het onbesinnet wesen, so sullet ghy leuen, ende gaet op den wech des verstandts.

7

Wie den ^c bespotter tuchtiget, ⁺ die moet schande op hem nemen: ende wie den Godloosen straffet, die moet ghehoont worden.

c Bespotters heet Salomo alle verachters ende wederspannighe der waerheyt.

+ De werelt wil ongestraft zijn

8

Straft den bespotter niet: hy hatet dy: straft den wijsen, die sal dy lief hebben.

9

^* Geeft den wijsen, so sal hy noch wijser worden: leert den rechtueerdighen, so sal hy in der leere toenemen.

* te weten, onderwijsinghe.

B.10

^d Der wijsheyt begintsel, is des Heeren vreese: ende het verstandt leert wat heylich is.

d Psalm. 111.b.10. Prouerb. 1.a.7. Syr. 1.b.16.c.25.

11

^e Want door my sullen dyner dagen vele worden, ende der Iaren dynes leuens, sullen meer worden.

e Prouer. 4.b.10.

12

Bistu wijs, so bistu dy wijs: ⁺ bistu een bespotter, so saltu het alleen draghen.

+ Non me Doctorem, sed te deluseris ipsum.

13

Daer is ia een dwaesachtich onrustsaem wijf, vol klapperien, ende weet niets.

14

Die sitt in der deure haers huys, op den stoele, bouen in der stadt.

[fol. 205v]

15

Te nooden alle die daer voor by gaen, ende oprechtich op haren weghe wandelen.

16

Wie is onbesinnet? die make hem hier toe: ende ten dwasen spreeckt sy,

17

De ghestolen wateren zijn soete, ende het verborghen broodt, is ^f noodelick.

f Dat is, Daermen eenen toe nooden mach, keurspijse.

18

Hy weet Ia niet, dat aldaer dooden zijn, ende hare gasten in der dieper Hellen.