Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Een vermaninghe, hoererie te vermijden, 15. ende hem syner houwelick gheselschap alleen te houden.

A.1

MIin kindt, merckt op myne wijsheyt: neycht dijn oore tot myner leere.

2

Dat du behoudest goeden raet, ende dynen mont wete onderscheyt te hebben.

3

^a Want de lippen der hoeren zijn soet als honichseem, ende haer kele is glatter dan olye.

a Prouer. 2.b.16. ende 6.c.24. ende 7.a.5

4

Doch daer na bitter als alssen, ende scherp als een tweesnijdich sweerdt.

5

Hare voeten loopen ten doode onderwaerts: Hare ganghen verreycken de Helle.

6

^b† Sy en gaet niet stracx op den wech des leuens: onghestadich zijn hare ^c treden, dat sy niet en weet, waer sy gaet.

b† And. Oft du schoon den wech [haers] leuens weghest, so zijn hare treden so ongestadich, dat duse niet bekennen en konnest.

c Prouerb. 4.b.19

7

^d So luystert my nu, myne kinderen, ende en wijckt niet vander reden mijns monts.

d Prouerb. 1.a.8. ende. 4.a.1.

8

^e Laet dyne weghen verre van haer zijn, ende en naerdert dy niet ter deuren haers huys.

e Syrac. 9.a.6.8.

9

Dat du niet den ^f vreemden en gheuest dijn eere, ende dyne Iaren den grousamen.

f Want de hoereniaghers verteeren haer goet, ende leuen met boose boeuen: die hen daer na niet gruys noch de korste van den broode gheuen: ghelijck den sone int Euangelio geschiedde, doe hy zijn goet verbrast hadde. Luc. 15.

B.10

Dat hem gheen vreemde van dynen vermoghen en versadighe, ende dynen arbeyt niet en zy in eens anders huys.

11

Ende moetest daer na suchten, wanneer du dijn ^g lijf ende goet verteert hebst,

g Prouer. 29.a.3.

12

Ende spreken: Och ^† hoe hebbe ick de tucht ghehaet? ende mijn herte de straffe versmaedt?

† And. Waerom

13

Ende en hebbe niet gehoort der stemme myner leeraers, ende mijn oore niet gheneycht tot dien, die my leerden?

14

Ick ben schier in alle ongheluck ghekomen, voor allen lieden ende allen volcke.

15

Drinckt water wt dynen putte, ende vloeden wt dyner fonteynen.

16

Laet dyne fonteyne wt vlieten, ende de waterbeken op de strate.

17

Hebt duse dannoch alleene, ende niemant vreemdes met dy.

18

Dijn fonteyne zy ghesegent, ende verheucht dy der vrouwen dyner ieucht.

19

Sy is lieffelick als ^h een hinde, ende gunstrijck als een Rhee.

h Dat is, op eens gemeynen spreucx wijse gesproken, also vele, als, Blijft by dyner vrouwen ende kinderen, ende bewaert dijn goet, dat du het met hoeren niet ombrengest, maer anderen daer mede helpest. De vrouwe ende kinderen zijn het lieflicste, daer houdt dy toe. Want gheen lieflicker wesen is op Aerden, dan dat hen man ende wijf vriendelicken te samen houden. Ecclesiast. 9.a.9.

[fol. 204v]

C.20

Laet dy hare liefde alle tijt versadighen, ende verquickt dy alleweghe in harer liefde.

21

Mijn kint, waerom wiltu dy aen der vreemder verquicken, ende omhelsest dy met eener anderen?

22

ⁱ Want eens yegelicx wegen, zijn stracx voor den Heere, ende hy metet ghelijck alle hare ganghen.

i Hiob. 31.a.4. enee 34.c.21.

23

^k De misdaedt des Godloosen, sal hem vanghen, ende sal met den strick syner sonden, ghehouden worden.

k Prou. 29.a.1.6. ende. 15.b.10. Sapien. 3.b.11.

24

Hy sal steruen, daerom dat hy hem niet wil onderwijsen laten, ende om syner grooter dwaesheydt wille, sal ^l† het hem niet wel gaen.

l† An. hy dwalen