Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Uermaent, men sal de wijsheyt met haren vruchten ende weghen, vlijtich soecken, 14. de Godloosen mijden. 23. ende des lijfs leden voor erch bewaren ende hoeden.

A.1

HOort ^a myne kinderen, de tucht ws vaders: ⁺ merckt op, dat ghy leert ende kloeck wordet.

a Prouerb. 1.a.8. ende 6.a.7.

+ Een vaderlicke vermaninge tot Gods woort.

2

Want ick gheue v een goede ^b† leere: en verlaet myne Wet niet.

b† And. gaue:

3

Want ick was mijns vaders sone, een teerlinck ende een eenich voor myner moeder.

4

Ende hy leerde my, ende sprack: ^c Laet dijn herte, myne woorden aennemen: houdt mijn ghebot, so saltu leuen.

c Deuter. 6.a.7. ende. 1.b.18. ende. 32.e.46.

5

Neemt aen de wijsheyt, neemt aen verstandt: verghetet niet, ende en wijckt niet vander reden mijns monts.

6

Verlaetse niet, so sal sy dy bewaren: hebtse lief, so sal sy dy behoeden.

7

Want der wijsheyt beghinsel is, wannermen ^d† se gheerne hoort, ende de kloeckheyt lieuer heeft, als alle goederen.

d† An. voor haer handelt

8

Achtetse hooch, ⁺ so sal sy dy verhoogen, ende sal dy tot eeren maken, ist dat duse omuangest.

+ Gods woort brengt eere ende verstant. Deute. 26.b.18.

9

Sy sal dijn hooft schoon ^e vercieren, ende sal dy vercieren met eener schooner kroonen.

e Of, toyen, opmutzen

B.10

So hoort mijn kint, ende neemt aen myne reden: so ^f sullen dyner goede Iaren vele worden.

f Prouer. 9.b.12. ende. 10.c.27.

11

Ick wil dy op den wech der wijsheyt voeren: ick wil dy op de rechte bane leyden.

12

Dat, wanneer du gaest, dynen ganck dy niet suer en worde, ende wanneer du loopest, dat du dy niet aenstootest.

13

Vatet de tucht, laet daer niet van af, bewaertse: want sy is dijn leuen.

14

^g Koemt niet op der Godloosen padt, ende en treedt niet op den wech der boosen.

g Psalm. 1.a.1.

15

Laet hem varen, ende en gaet daer niet inne: wijckt van hem, ende gaet voorby.

16

^h Want sy en slapen niet, sy en hebben dan quaet ghedaen: ende sy en rusten niet, sy en hebben dan schade ghedaen.

h Psalm. 10.a.2. Prouerb. 1.b.10.

17

Want sy gheneeren hen vanden Godloosen broode, ende drincken vanden wijn des ⁱ wreuels.

i Dat is, stouten ghewelts.

18

^k Doch der rechtueerdighen padt, schijnt als een licht, dat daer voort gaet, ende lichtet tot op den vollen dach.

k Luc. 11.d.36. Sapient. 3.a.7.

19

^l Der Godloosen wech daerenteghen, is als donckerheyt, ende en weten niet, waer sy vallen sullen.

l Iob. 5.d.36. Iesa. 59.b.10. 2.Petri. 1.a.9.

C.20

Mijn sone, merckt op myne woorden, ende neycht dyne ooren tot myner reden.

21

^m Laetse niet van dynen ooghen komen, behoudtse in dyner herten.

m Nume. 15.d.38. Deuter. 11.b.18.

22

Want sy zijn het leuen, dien, diese vinden, ende ghesondt haren gantschen lijue.

23

Bewaert dijn herte met allen vlijt: want daer wt gaet het leuen.

24

Doet van dy den verkeerden mont, ende laet den laster mont verre van dy zijn.

25

Laet dyne ooghen stracx voor hen sien, ende dyne ooghenleden recht voor dy henen sien.

26

^n† Laet dynen voet ghelijck voor hem henen gaen, so gaestu ghewisse.

n† And. Weecht den ganck dyner voeten, dat du ordentlick geschicket gaest.

27

^o Wijckt niet ter rechter, noch ter slincker hant: wendt dynen voet vanden quaden.

o Deuter. 4.a.2.b.14. ende. 5.d.32. ende 17.b.11. ende. 28.b.14. Iosue. 23.a.6. Iesa. 30.c.21.