Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Hoemen wijsheyt verkrijcht, 9. ende wat nut daer wt volcht.

A.1

MIin kint, ^{+ a} wiltu myne reden aennemen, ende myne gheboden by dy behouden:

+ Een vermaninge tot Gods woort.

a Iob. 22.b.12.

2

So laet dijn oore op wijsheydt achtinghe hebben, ende neycht dijn herte ^b met vlijte daer toe.

b Dat is, Du moest groote acht daerop gheuen, ende van herten vlijtich zijn.

3

Want so du met vlijte daer na roepest, ende daerom biddest:

4

So duse soeckst als siluer, ende vorsschet daerna, als na den schatten:

5

So saltu de vreese des Heeren verstaen, ende de bekentenisse Gods vinden.

6

^c Want de Heere gheeft wijsheyt, ende wt synen monde koemt bekentenisse ende verstandt.

c Psalm. 119.a.7. Syrach. 1.a.1. Daniel. 2.c.21. Iacob. 1.a.5.

7

Hy laet het den oprechtighen wel ^d ghelucken, ende beschermt de vromen:

d Of, slaen,

8

Ende behoedet die, die recht doen, ende bewaert den wech syner Heylighen.

9

Dan saltu verstaen, gherechticheydt, ende recht, ende vromicheydt, ende allen goeden wech.

B.10

So dy de wijsheydt ter herten gaet, ende dijn ziele lust heeft ter bekentenisse.

11

^e So sal dy den goeden raedt bewaren, ende verstant sal dy behoeden.

e Sapien. 8.a.9.

12

Dat du beurijdt wordest vanden weghe der boosen, ende vanden verkeerden klappaerts.

13

Die daer verlaten de rechte bane, ende gaen duystere weghen.

14

Die hen verheughen quaet te doen, ende zijn vrolick in haren verkeerden boosen wesen:

15

Welcke haren wech verkeeren, ende volghen den afweghen.

16

^f Dat du beurijdet wordest van ^g† eens anderen wijf, ende die dyne niet en is, die glatte woorden gheeft.

f Prouerb. 5.a.3. ende 7.a.5.

g† An. eener wtlandischer ende vreemder vrouwen die, etc.

17

Ende verlaet den ^h heere harer ieucht, ende vergheet het verbondt haers Gods.

h Dat is, haren getrouden man, dien sy ionck genomen heeft.

18

Want haer huys neycht hem ten doode, ende hare ganghen tot ^i† den verlorenen.

i† And. der Helle

19

Alle die tot haer in gaen, die en komen niet weder, ende en begrijpen den wech des leuens niet.

C.20

Op dat du wandelest op eenen goeden weghe, ende blijuest op de rechte bane.

21

^k Want de rechtueerdighe sullen inden lande woonen, ende de vromen sullen daerin blijuen.

k Psalm. 37.c.29. ende 69.d.38.

22

^l Daerenteghen de Godloosen worden wtgheroeyt wt den lande, ende de verachters worden daerwt verdelghet.

l Hiob. 18.b.17. Psal. 37.a.9.c.20. ende 101.a.8. ende 119.m.119.