Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxlix. Psalm.

1. Een vermaninge ter dancksegghinge voor de ghenade, die ons int Euangelio voorghedragen wort, Dat God een welbehaghen hebbe aen synen volcke: dat is, dat hy niet toorne, maer wt ghenade de sonden vergeue. Item dat hy de Kercke, onder den cruyce in deser werelt, bescherme, also dat sy in het woort de ouerhant behoude, Koninghen ende volcken verootmoedicht, dat sy den Euangelio ghehoorsaem worden: want dat zijn de banden ende kerckers, daer de menschelicke vernuft mede bedwonghen wort.

A.1

Haleluya.

2

SInget den Heere een nieuwe liedt: ^a de Ghemeynte der Heyligen sal hem louen.

a Iesa. 42.b.10. Iudith. 16.b.17.

3

Israel verheuge hem diens, die hem gemaect heeft: de kinderen Zions zijn vrolick ouer haren Koninck.

4

Sy sullen louen synen Name ^b in reyen, met tamborinen ende harpen sullen sy hem spelen.

b Psalm. 150.a.4.

5

^c Want de Heere heeft een welbehaghen aen synen volcke, hy helpt den ellendigen heerlick.

c Psal. 147.b.11.

6

De Heyligen sullen vrolick zijn, ende prijsen ende roemen op hare legheren.

7

Haren mont sal God verhoogen, ende sullen ^d† scherpe sweerden in hare handen hebben.

d† An. een tweesnijdich sweert Hebr. 4.b.12.

8

Dat sy wrake oeffenen onder de Heydenen, straffe onder den volcken.

9

Hare Koningen te binden met ketenen, ende hare edelen met ijseren veteren.

10

^e Dat sy hen doen het recht daer van geschreuen staet: ^f sulcke eere sullen alle syne Heyligen hebben. Haleluya.

e Deute. 32.e.41.

f Ioan. 16.a.8.