Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxlviij. Psalm.

1. Een vermaninghe tot dancksegghinghe, voor alle schepselen Gods, daer God syne goedertierenheyt ende macht inne vertoont, dat wy leeren, so eenen goedigen ende machtighen God, in allerley vare ende noot vertrouwen ende hem vreesen.

[fol. 203r]

A.1

Haleluya. LOeft ghy ^a† Hemelen den Heere, loeft hem inder hoochde.

a† And. vanden Hemelen. Psalm. 69.d.35.

2

Loeft hem alle zijn Enghelen, loeft hem alle syne heyren.

3

^b Loeft hem Sonne ende Mane, loeft hem alle lichtende Sterren.

b Dan. 13.f.58. Psalm. 103.c.20.

4

Loeft hem ghy Hemelen ^c† allenthaluen, ende ^d de wateren die bouen aenden Hemel zijn.

c† And. aen allen zijden

d Dan. 3.f.58.

5

Die sullen louen den Name des Heeren: want hy ^e ghebiedt, so wordt het gheschapen.

e Sijn woort, dat is, wat hy wil. Psalm. 33.a.9. Genes. 1.a.1. Iudith. 16.b.17. 4.Esdr. 16.f.56.

6

Hy onderhoudtse altoos ende eewichlick: hy ordineertse, dat sy niet anders gaen en moeten.

7

Loeft den Heere op Aerden, ghy Waluisschen ende alle diepten:

8

^f Vyer, haghel, sneeu ende damp, stormwinden die zijn woort wtrichten.

f Dan. 3.g.66.

9

Berghen ende alle kleyne berghen, vruchtbare boomen, ende alle Cederen.

B.10

Dieren ende alle vee, ghewormte ende voghelen.

11

Ghy Koninghen op Aerden, ende alle lieden, Vorsten ende alle Richters op Aerden.

12

Ionghelinghen ende maechden, de oude met den ionghen.

13

Sullen louen den Name des Heeren: want synen Name alleene is hooch: synen lof gaet so wijdt als Hemel ende Aerde is.

14

Ende hy verhoocht den hoorne zijns volcks: ^g alle syne Heylighen sullen hem louen, de kinderen Israels, het volck dat hem dient. Haleluya.

g Psal. 145.b.10.