Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 202v]

Den Cxlv. Psalm.

1. Eenen schoonen Psalm, daer hy een dancsegghinge inne veruatet, voor het Rijcke Christi, dat het zy een Rijcke der barmherticheyt ende genade, 13. daertoe een eewich Rijcke, 14. daerin de veruallen opgherichtet, 18. de bidders verhoort, 19. ende die in vare ende kommer zijn, gheregeert, beschuddet ende beschermt worden: dit zijn voornemelicke weldaden, dier men int Rijcke Christi ghenietet in desen leuen.

A.1

Eenen lof Dauids. Aleph. ICk wil dy verhooghen mijn God du Koninck, ende dynen Name louen altoos ende eewichlijck.

2

Beth. Ick wil dy daghelicx louen, ende dynen Name roemen altoos ende eewichlick.

3

^a Gimel. De Heere is groot ende seer loffelick, ende syne grootheyt is ^b† onwtsprekelick.

a Psalm. 69.a.4. Syrach. 43.e.42.

b† And. ongrondeerlick.

4

Daleth. Kints kinderen sullen dyne wercken prijsen, ende van dyner ghewelt segghen.

5

He. Ick wil spreken van dynen heerlicken schoonen prale, ende van dynen wonderen.

6

Vau. Datmen sal spreken van dynen heerlicken daden, ende datmen vertelle dyne heerlickheyt.

7

Zayn. Datmen prijse dyne groote goedertierenheyt, ende dyne gherechticheyt roeme.

8

Heth. ^c Ghenadich ende barmhertich is de Heere, gheduldich ende van grooter goedertierenheyt.

c Exod. 34.a.6. Psalm. 86.b.15. ende 103.a.8. ende 116.a.5. Ione 4.a.2. Ioel 2.b.13. 2.Esd. 9.b.17.

9

Thet. De Heere is alleen goedich, ende ontfermt hem ouer alle syne wercken.

B.10

Iod. Alle dyne wercken Heere sullen dy dancken, ende dyne Heylighen dy louen.

11

Caph. Ende de eere dijns Koninckrijcx roemen, ende van dyner ghewelt spreken.

12

Lamed. Dat den menschen kinderen dijn ghewelt kondt worde, ende de eerlicke prael dijns Koninckrijcx.

13

Mem. ^d Dijn Rijcke, is een eewich Rijcke, ende dyne heerschappie ^e† duert voort ende voort.

d Psalm. 45.a.7.

e† An. voor ende na

14

Samech. ^f De Heere behoudt alle die daer vallen, ende richtet op alle die neder gheslaghen zijn.

f Psalm. 34.c.20. ende 37.c.24. Prouer. 24.b.16.

15

Ayn. ^g Aller ooghen ^h wachten op dy, ende du geefst hen hare spijse te syner tijt.

g Psal. 104.c.27.

h Of, hebben achtinge op dy, ende verbeyden.

16

Pe. Du doest dyne hant op, ende veruullest alles wat leuet, met ⁱ welgheuallen.

i Dat is, genoech ende satt, dat sy een welgeuallen daer aen hebben mogen: hoewel de gierige wat anders soeckt.

17

Zade. De Heere is rechtueerdich in alle synen weghen, ende heylich in alle syne wercken.

18

Coph. ^k De Heere is na by allen, die hem aenroepen, allen die hem met ernste aenroepen.

k Deute. 4.a.7.

19

Resch. ^l Hy doet wat de Godureesende begheeren, ende hoort haer schreyen, ende helpet hen.

l Ioan. 15.a.7. 1.Ioan. 3.c.22. Matth. 18.b.19. Mar. 11.c.24.

C.20

Schin. De Heere bewaert alle, die hem lief hebben, ende sal verdelghen alle Godloosen.

21

Tau. Mynen mont sal des Heeren lof segghen: ende alle vleesch loue synen heyligen Name, altoos ende eewichlick.