Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxliiij. Psalm.

1. Eenen schoonen Psalm, daer hy God in te gelijck dancket, ende biddet voor het Rijcke ende de Kercke, teghen alle vyanden, oproerische lieden, ende vasche Propheten. 3. Ende veruatet een sonderlinghe ^a aenmoedinghe, dat hy hem verwondert, dat God tegen den ondanckbaren ende boosen menschen so goedich ende weldadich zy. Heere seyt hy, wat is de mensche, dat, etc.

a Griecx, pathos.

A.1

Eenen Psalm Dauids. GEloeft zy de Heere, mynen ^b troost, ^c die myne handen leert strijden, ende myne vuysten krijghen.

b Hort of rotze.

c Psalm. 18.d.35. 2.Sam. 22.d.35.

2

^d Myne goedertierenheyt ende myne borcht, mijn beschuttinge, ende mijn verlosser, mynen schilt, op dien ick betrouwe, dien mijn volck onder my dwinghet.

d Psalm. 18.a.3.

3

^e Heere, wat is de mensche, dat du syner aennemest? ende des menschen kindt, dat du hem so achtest?

e Psalm. 8.a.5. Iob. 7.b.17. Sapient. 2.a.5. ende 5.a.9.

4

De mensche is doch ghelijck als niets: ^f synen tijt vaert daer henen, als een schaduwe.

f Hiob. 8.a.9. ende. 14.a.2. 1.Paral. 30.b.16.

5

Heere, neycht dyne Hemelen, ende vaert af, tast de berghen aen, dat sy roocken.

6

^g Laett blixemen, ende verstroytse: schiet dynen ^h† stralen, ende verschricktse.

g Dat is, Laet een mael donderen, ende slaet daer in.

h† And. pijlen

7

Sendt dyne handt vander hoochde, ende verlost my: ende ⁱ verlost my van groote wateren: vander handt der ^k vreemder kinderen.

i of, helpt my wt

k Dat is, die niet recht Gods kinderen zijn int ghelooue, maer hebben alleen den name ende schijn.

8

Welcker ^l† leere is gheen nutte, ende hare wercken zijn valsch.

l† an. mont spreect ijdele dinghen, ende haer rechter hant is een valsche rechterhant.

9

God, ick wil dy een nieuwe liedt singhen: ick wil dy spelen op den Psalter van tien snaren.

B.10

Die du den Koninghen de ouerwinninghe gheefst, ende verlossest dynen knecht Dauid, vanden moorderschen sweerde des boosen.

11

Verlost my oock ende beschermt my vander hant der vreemder kinderen: welcker leere en is gheen nutte, ende hare wercken zijn valsch.

12

^m Dat onse sonen opwassen in haren ieucht als de planten, ende onse dochteren, als de wtgehouwen ⁿ arckeners, ghelijck als de palleysen.

m Also spreken ende wenschen die op God niet en bouwen: als de rijcke man int Euangelie. Luc. 12. cap.

n Springbouwen of, ouerspronghen

13

Ende onse kameren vol zijn, die wtgheuen konnen eenen voorraedt na den anderen: dat onse schapen dragen duysent, ende hondert duysent op onsen dorpen.

14

Dat onse ossen vele arbeyts voortbrenghen: dat gheen ^o† schade, gheen verlies, noch ^p klaghe op onsen straten en zy.

o† An. inbreucken, gheen verloopen, noch, etc.

p Dat is, Dat ons gheen ongheual, siecte oft plage en treffe, maer alles ghenoech hebben, seker ende vrolic in aller volheyt leuen:

15

^q Wel den volcke, dien het also gaet: doch wel dien volcke, diens de Heere een God is.

q Psalm. 33.b.12.